महाराजगञ्जमा लक्जरी ‘कर्मा रेजिडेन्सी’ बन्दै, अर्को वर्षदेखि अपार्टमेन्ट हस्तान्तरण गर्ने

काठमाडौँ: बढ्दो शहरीकरण र व्यवस्थित बसोबासप्रतिको बढ्दो आकर्षणका कारण राजधानीमा अपार्टमेन्ट र लक्जरी होटलमा निजी क्षेत्रको लगानी थुप्रिन थालेको छ। यसैक्रममा, कर्मा तेन्जिङको नेतृत्वमा रहेको ‘गुडकर्मा ग्रुप अफ कम्पनीज’ ले घरजग्गा (रियल इस्टेट) र आतिथ्य (हस्पिटालिटी) क्षेत्रमा आफ्नो बलियो उपस्थिति जनाउँदै अर्बौँका परियोजना अगाडि बढाएको छ।

गुडकर्मा ग्रुपले राजधानीको कूटनीतिक क्षेत्र महाराजगञ्जमा सुविधासम्पन्न लक्जरी अपार्टमेन्ट ‘कर्मा रेजिडेन्सी’ निर्माण गरिरहेको छ। हालसम्म यस परियोजनाको ७८ प्रतिशत वित्तीय प्रगति भइसकेको छ। रेजिडेन्सीको ५७ प्रतिशत बुक भैसकेको छ। ४३ प्रतिशत बिक्रीयोग्य क्षेत्र बुक हुन बाँकी रहेको कम्पनीले जनाएको छ। रेसिडेन्समा तीनवटा हाइराइज बिल्डङ हुने भएका छन्। २.५ र ३.५ बीएचके अपार्टमेन्ट बनिरहेका छन्। निर्माणाधीन अपार्टमेन्ट आगामी सन् २०२७ देखि हस्तान्तरण सुरु हुने कम्पनीले जनाएको छ।

महाराजगञ्ज क्षेत्रमा आठ लेनको रिङ रोड बनिरहेको प्रिमियम कुटनीतिक क्षेत्र हो। यस क्षेत्रको एक मात्र विलासी अपार्टमेन्ट भएकोले अमेरिका, अष्ट्रेलिया, थाईल्याण्ड र साउदी अरबका दूतावासका साथै प्रमुख दूतावाशहरू नजिक अवस्थित रहेकोले आवासीय माग बलियो हुने देखिएको छ।

गुडकर्मा ग्रुपले किन्यो ठमेलको वैशाली होटल, दुई अर्ब ६७ करोड लगानीमा पाँचतारे होटल बनाउँदै

गुडकर्मा ग्रुपको नेतृत्व कर्मा तेन्जिङले गरेका छन्। उनले फोर्डह्याम विश्वविद्यालय अमेरिकाबाट अर्थशास्त्रमा विद्यावारिधि गरेका छन्।

गुडकर्मा समूहको रियल इस्टेट, शिक्षा र आतिथ्य क्षेत्रमा लगानी रहेको छ। ग्रुपको स्थापना सेप्टेम्बर २०२० मा भएको हो। ग्रुपमा कर्माको ९४ प्रतिशत स्वामित्व रहेको छ। कम्पनीले दुई अर्ब आठ करोड रुपैयाँ ऋणको रेटिङ गराएको छ।

काठमाडौं जस्ता शहरी केन्द्रहरूमा आवासीय घरजग्गाको माग संरचनात्मक रूपमा बलियो छ। शहरीकरण, पूर्वाधारको उपलब्धता, रोजगारी केन्द्रहरूको निकटता र संगठित आवासको लागि प्राथमिकतामा परेको छ।

आवासीय घरजग्गालाई अपेक्षाकृत सुरक्षित दीर्घकालीन लगानीको बाटोको रूपमा पनि हेरिने गरेको छ। अर्थतन्त्र सुस्त हुँदा पछिल्लो समयमा अपार्टमेन्टको मागमा केही कमी आएको छ।

यस्तै गुडकर्माले राजधानीको ठमेलमा रहेको होटल वैशालीलाई खरिद गरी पाँच तारे बनाउने भएको छ। प्रस्तावित पाँचतारे होटल बनाउन दुई अर्ब ६७ करोड ७० लाख रुपैयाँ लाग्ने अनुमान गरिएको छ। जसमा २५ प्रतिशत स्वपुँजी (इक्विटी) र ७५ प्रतिशत बैंकको ऋण हुने गरी लगानी संरचना बनाइएको छ।

होटल हाल पुनर्निमाण प्रारम्भिक चरणमा रहेको मनाङ हस्पिटालिटी प्रालिले जनाएको छ। कम्पनीले आगामी सन् २०२७ मा आंशिक रूपमा ‘सफ्ट लन्च’ गर्ने र २०२८ सम्ममा पूर्णरुपमा व्यावसायिक सञ्चालन गर्ने योजना बनाएको छ।

कम्पनीले ठमेलमा अवस्थित होटल वैशालीको अवस्थित सम्पत्तिलाई ‘फोर पोइन्ट्स बाइ शेराटन’ ब्रान्डअन्तर्गत पाँचतारे होटलमा अधिग्रहण र पुनर्निर्माण गर्ने योजना बनाएको हो। प्रस्तावित होटलमा १०८ वटा कोठा हुने भएका छन्।

साथै, परियोजनाले फोर पोइन्ट्स बाइ शेराटन ब्रान्डको ब्रान्ड नामअन्तर्गत सञ्चालन गर्न हङकङ लिमिटेडको लक्जरी होटल्स इन्टरनेशनलसँग होटल व्यवस्थापन सम्झौता सफलतापूर्वक अन्तिम रूप दिएको छ।

म्यारियट इन्टरनेशनल ३७ भन्दा बढी प्रसिद्ध ब्रान्डहरू र ९ हजार भन्दा बढी सम्पत्तिहरूको पोर्टफोलियो भएको विश्वको अग्रणी आतिथ्य कम्पनीहरू मध्ये एक हो। यो रणनीतिक साझेदारीले परियोजनाको ब्रान्ड मूल्यलाई उल्लेखनीय रूपमा विस्तार गर्ने अपेक्षा गरिएको छ।