मध्यपूर्व झनै अशान्तः कच्चा तेलको भाउ आकासिएर पुग्यो ब्यारेलको १२० डलर

काठमाडौं। मध्यपूर्वमा जारी युद्धले तेल आपूर्तिमा झनै असहज बनेको छ। जारी युद्धले तेल बजारलाई थप अस्थिर बनाएको छ। इरानले खाडी तेल बोक्ने जहाजलाई लक्षित गर्दै नयाँ ड्रोन तथा क्षेप्यास्त्र आक्रमण गरेको छ।

समाचार संस्था एएफपीका अनुसार बिहीबार बिहान मात्रै दुई तेल ट्यांकरमा आक्रमण भएको केही घण्टामै अन्तर्राष्ट्रिय बजारमा कच्चा तेलको मूल्य प्रतिब्यारेल १२० डलर पुगेको छ।

मुरवान क्रुडमा कच्चा तेलको भाउ बढेर ब्यारेलको ११९.८ डलर पुगेको आयल प्राइस डटकमले जनाएको छ। यस्तै ब्रेन्ट क्रुडमा ९६.३८ र डल्युटीआइ क्रुडमा ब्यारेलको ९१.१३ डलरमा कारोबार भएको छ। सोमबार कच्चा तेलको भाउ ब्यारेलको ११९ डलर नजिक पुगेको थियो। त्यसपछि ब्यारेलको १०० डलर भन्दा कम भएको थियो।

इरानले खाडी क्षेत्रका अन्य मुलुकका साथै कट्टर शत्रु इजरायलतर्फ नयाँ आक्रमण बढाएपछि मध्यपूर्वमा तनाव झनै चर्किएको छ।

होर्मुज जलडमरूमध्ये आसपासका समुद्री मार्गहरू पनि प्रभावित भएका छन्। संयुक्त अरब इमिरेट्सनजिकै एउटा कन्टेनर जहाजलाई अज्ञात प्रक्षेप्यले प्रहार गर्दा सानो आगलागी भएको बेलायती समुद्री सुरक्षा एजेन्सीले जनाएको छ। इराकनजिक दुई तेल ट्यांकरमा आक्रमण हुँदा कम्तीमा चालक दलका एक सदस्यको मृत्यु भएको र ३८ जनालाई उद्धार गरिएको अधिकारीले बताएका छन्।

मध्यपूर्वमा बढ्दो द्वन्द्वका कारण विश्व बजारमा तेलको मूल्य अस्थिर बनेपछि अमेरिकाले आफ्नो रणनीतिक पेट्रोलियम भण्डारबाट १७ करोड २० लाख ब्यारेल तेल बजारमा पठाउने योजना सार्वजनिक गरेको छ।

अमेरिकी ऊर्जा विभागका अनुसार आगामी सातादेखि तेल भण्डार बजारमा पठाउन सुरु गरिनेछ र वितरण प्रक्रिया करिब १२० दिनसम्म चल्नेछ। फेब्रुअरी २८ देखि अमेरिका र इजरायलले इरानमाथि हवाई आक्रमण सुरु गरेपछि विश्व बजारमा तेलको मूल्य निरन्तर बढिरहेको छ।

यसबीच अन्तर्राष्ट्रिय ऊर्जा एजेन्सीले पनि आपूर्ति अवरोध कम गर्न आफ्ना ३२ सदस्य देशको आपतकालीन भण्डारबाट ४० करोड ब्यारेल तेल बजारमा पठाउने निर्णय गरेको छ।