सांसदको तलब ६६ हजार ७० रुपैयाँ, मासिक १८ हजार घरभाडासहित के के पाउँछन् थप सुविधा?

काठमाडौँ: हालै सम्पन्न प्रतिनिधिसभा निर्वाचनबाट प्रत्यक्षबाट १६५ र समानुपातिक ११० गरी १७५ जना सांसद आउँदैछन्। निर्वाचित सांसदले के कस्तो सुविधा पाउँछन् भन्ने आम चासोको विषय हो। निर्वाचित सांसदहरूले संसद् छिर्नुअघि निर्वाचित भएर पहिलोपटक काठमाडौँ आएदेखि राज्यले सेवासुविधा प्रदान गर्ने गरेको छ।

संघीय संसद सदस्य पारिश्रमिक तथा सुविधा ऐन, २०७३ अनुसार संघीय संसद्का सदस्यहरूले मासिक तलब ६६ हजार ७० रुपैयाँ पाउँछन्। तर तलब मात्र होइन, उनीहरूले घरभाडा, सञ्चार खर्च, भ्रमण भत्ता, बैठक भत्ता लगायत विभिन्न शीर्षकमा थप सुविधा पनि पाउने व्यवस्था छ।

व्यवस्थाअनुसार सांसदहरूले मासिक तलबसँगै १८ हजार रुपैयाँ घरभाडा पाउँछन्। यसका अतिरिक्त सञ्चार खर्च, पानी–विद्युत खर्च, विशेष भत्ता तथा संसदीय समिति बैठक बसेका दिनका लागि छुट्टै भत्ता पनि उपलब्ध हुन्छ।

सांसद बनेर पहिलो पटक काठमाडौं आउँदा यातायात खर्चसमेत सरकारले व्यहोर्ने व्यवस्था छ भने पहिलो पटक राजधानी आउँदा खाजा खर्चका रूपमा ६ हजार २५० रुपैयाँ दिइन्छ। सांसद बनेपछि फर्निचर खरिदका लागि १५ हजार रुपैयाँ पनि उपलब्ध गराइन्छ।

त्यस्तै, सांसदहरूले मासिक रूपमा ३ हजार रुपैयाँ सञ्चार खर्च र २ हजार रुपैयाँ पानी तथा विद्युत् खर्च पाउँछन्। मासिक १ हजार रुपैयाँ विशेष भत्ता पनि उनीहरूलाई उपलब्ध हुन्छ।

संसदीय समिति वा बैठक बसेका दिन सांसदहरूले दैनिक १ हजार रुपैयाँ बैठक भत्ता पाउँछन् भने सोही दिनको आउजाउ खर्चका रूपमा थप १ हजार रुपैयाँ दिइन्छ।

भ्रमणका क्रममा पनि सांसदहरूले सुविधा पाउँछन्। देशभित्र भ्रमण गर्दा दैनिक २ हजार ५०० रुपैयाँ भत्ता उपलब्ध हुन्छ भने विदेश भ्रमण गर्दा दैनिक २२५ अमेरिकी डलर पाउने व्यवस्था छ। विदेश भ्रमणका क्रममा १० लाख रुपैयाँसम्मको यात्रा बीमा पनि गरिन्छ।

त्यसैगरी सांसद पदमा रहँदाको अवस्थामा मृत्यु भए परिवारलाई २० लाख रुपैयाँ र अपांगता भएमा ५० लाख रुपैयाँसम्म क्षतिपूर्ति उपलब्ध गराउने व्यवस्था रहेको छ।