श्रममन्त्री साह पदमुक्त, स्वास्थ्यमन्त्री मेहतालाई चेतावनी

काठमाडौँ: श्रम, रोजगार तथा सामाजिक सुरक्षाममन्त्री दीपककुमार साहलाई प्रधानमन्त्री वालेन्द्र साहले पदमुक्त गरेका छन्। मन्त्रीमा बहाल रहँदा पदीय मर्यादाको दुरुपयोग गरी श्रीमतीलाई लामो समयदेखि निष्क्रिय राखिएको स्वास्थ्य बीमा बोर्डको सदस्यमा नियमित गराउने कार्य गरेको भन्दै उनलाई पदमुक्त गरिएको हो।

पार्टीको केन्द्रीय अनुशासन आयोगको अध्ययनबाट साहले पदीय मर्यादाको दुरुपयोग गरेको देखिएको भन्दै सभापति रवि लामिछानेले प्रधानमन्त्रीसमक्ष साहलाई पदमुक्त गर्न सिफारिस गरेका थिए। अनुसन्धान आयोगले बुधबार साहलाई कारबाही गर्न सिफारिस गरेको थियो।

साहको गतिविधिले पार्टीको छवि, आदर्श, सिद्धान्त र मर्यादामाथि आँच आउने देखिएको निष्कर्ष रास्वपाको छ। पार्टी विधानको धारा २५ (४) (क) ले पार्टी सभापतिलाई पार्टीको आदर्श, सिद्धान्त र मर्यादामाथि आँच आउन नदिन जिम्मेवारी सुम्पेको र पदको दुरुपयोग भएको अवस्थामा विधानको धारा ६९ मा पार्टीले जिम्मेवारीबाट फिर्ता बोलाउनसक्ने व्यवस्थाअनुसार उनलाई पदमुक्त गर्ने निर्णय गरिएको हो।

यस्तै आफ्नो जिम्मेवारीमा अपेक्षित गाम्भीर्यता नदेखिएको भन्दै स्वास्थ्य तथा जनसंख्यामन्त्री निशा मेहतालाई सचेत गराइएको छ।