एक अर्ब लगानीमा झापा कमलमा खुल्यो भृकुटी ‘मल्टिस्पेसियालटी’ अस्पताल

काठमाडौँ: निजी लगानीमा झापाको कमल गाउँपालिकामा भृकुटी अस्पताल बन्दैछ। अस्पताल परियोजना निर्माण अन्तिम चरणमा छ।

निर्माण सम्पन्न नभए पनि अस्पतालले यही महिनादेखि आंशिक रूपमा सञ्चालन सुरु गरेको छ। जहाँ पहिलो महिनामा ओपीडी सेवाहरू निःशुल्क प्रदान गरिएको थियो। अस्पताल परियोजना आउँदो असारदेखि पूर्ण क्षमतामा सञ्चालन हुने भृकुटीले जनाएको छ।

मल्टिस्पेसियालिटी सुविधा भएको अस्पताल १०० बेडको हुनेछ। अस्पताल पूर्व–पश्चिम राजमार्ग नजिक पर्छ। अस्पताल ३०० बेडको प्रस्ताव गरिए पनि हाल १०० बेडका लागि मात्र इजाजत प्राप्त गरेको भृकुटी अस्पतालले जनाएको छ। बाँकी २०० बेड थप्ने योजना अस्पतालको छ।

 संरचनात्मक निर्माण कार्य लगभग पूरा भएको छ भने प्रमुख चिकित्सा उपकरणहरूको जडानको प्रक्रियामा छ।

अस्पतालको प्रतिबेड लागत अपेक्षाकृत कम रहेको छ। प्रतिबेड लागत ३४ लाख रुपैयाँ रहेको छ। यसबाहेक, एमआरआई, सीटी स्क्यान, र अन्य निदान र उपचार इकाइहरू जस्ता प्रमुख सुविधाहरू अझै पूर्ण रूपमा सञ्चालनमा छैनन्। जसले गर्दा परियोजनालाई निहित कार्यान्वयन जोखिममा पारिएको छ।

यसबाहेक प्रस्तावित ऋण कोषमा निर्भरता बढेको छ। पहिला ७० प्रतिशत ऋण र बाँकी ३० प्रतिशत स्वपुँजी (इक्विटी) को लगानी संरचना बनाइएको थियो। हाल लागत बढेपछि यसको संरचनामा परिवर्तन गरी ८०ः २० प्रतिशत बनाइएको छ।

संस्थापकहरुको स्वपुँजीको ५५ प्रतिशत लगानी गरिसकेका छन्। संशोधित ऋण आवश्यकताको लगभग ४४ प्रतिशत बाँध्न बाँकी छ। परियोजनाले निर्माण अवधिको ब्याज (आईडीसी) पनि २९ प्रतिशत बढेको छ। समग्र परियोजना लागत एक अर्ब दुई करोड रुपैयाँ भन्दा माथि पुग्ने सम्भावना छ।

भृकुटीका प्रमुख प्रवद्र्धकहरूमा बुद्धिमान थापा, प्रताप कार्की र नसिम कार्की हुन्। अस्पतालको अध्यक्षमा थापा रहेका छन्।