कच्चा तेलको भाउ घटे पनि ब्यारेलको अझै ११४ डलर माथि

एजेन्सी। पर्सियन खाडीमा रहेको होर्मुज जलमार्गमा जारी अवरोध अनिश्चित बन्दै गएपछि बिहीबार अन्तर्राष्ट्रिय बजारमा कच्चा तेलको भाउ बढेर ब्यारेलको १२६ डलर माथि पुगेको थियो।

तर, शुक्रबार भने केही घटेको छ। ब्रेन्ट क्रुडमा कच्चा तेलको भाउ घटेर ब्यारेलको ११४ डलर कायम भएको आयल प्राइसले जनाएको छ।

बिहीबार ब्रेन्ट क्रुडमा कच्चा तेलको भाउ ब्यारेलको ८.१७ प्रतिशत बढेर १२६ डलर पुगेको थियो। होर्मुज जलमार्ग पुनः खोल्न असफल कूटनी प्रयासहरु पछाडि तेलको भाउ बढेको हो।

२०२२ मा रुस र युक्रेन युद्ध सुरु भएपछि कच्चा तेलको मूल्य आकासिएर ब्यारेलको १४० डलरसम्म पुगेको थियो। त्यसपछि घटेर ब्यारेलको ५५ डलरमा आएको थियो।

आयल प्राइसका अनुसार वेस्ट टेक्सास इन्टरमिडिएट (डब्ल्युटीआई मा ब्यारेलको १०५.३ डलर कायम भएको छ। मुरवान क्रुडमा ब्यारेलको १०९.९ डलरमा झरेको छ।

इरान र अमेरिकाबीच तनाव बढ्दै जाँदा इरानले स्ट्रेट अफ होर्मुज र आफ्नो परमाणु कार्यक्रमका विषयमा अमेरिकासामु नझुक्ने संकेत गरेको छ।

इरानले अमेरिकाले आफ्नो बन्दरगाहमा लगाएको नौसैनिक नाकाबन्दी नहटाएसम्म परमाणु मुद्दामा कुनै पनि वार्ता नगर्ने अडान राखेको छ।

इरानले ओमानलाई साथमा लिएर स्ट्रेट अफ होर्मुजमा जहाजहरूबाट कर उठाउने र यमनका हुथी विद्रोहीहरूमार्फत बाब एल मन्डेब जलसन्धिमा दबाब सिर्जना गर्ने नयाँ रणनीति अपनाइरहेको विश्लेषण गरिएको छ।

तेहरानले फेब्रुअरीको अन्त्यदेखि होर्मुज हुँदै धेरैजसो गैरइरानी ढुवानीलाई प्रभावकारी रूपमा प्रतिबन्ध लगाएको छ। जबकि, वासिङगटनले धेरैजसो इरानीसम्बन्धित जहाजहरूलाई अवरुद्ध गरेर दबाब बढाएको छ।

यसैबीच, अन्तर्राष्ट्रिय समाचार संस्था रोयटर्सका अनुसार, ओपेक प्लसले आइतबारको बैठकमा दैनिक एक लाख ८८ ब्यारेल उत्पादन वृद्धिको घोषणा गर्ने अपेक्षा गरिएको छ।

युएईले मे १ देखि लागू हुने गरी उक्त समूह छोड्ने पुष्टि गरेको केही दिनपछि यो कदम आएको हो। यो निर्णयले समयसँगै ओपेक प्लसलाई कमजोर बनाउने निश्चित छ।