ऊनको स्वीटरले ४ र भूठानले ३ विधामा जित्यो अवार्ड

काठमाडौँ: चलचित्र ‘ऊनको स्वीटर’ले उत्कृष्ट फिल्मको अवार्ड पाएको छ। चलचित्र समीक्षक समाज, नेपाल (फिक्सन) ले प्रदान गर्ने ‘क्रिटिक्स फिल्म अवार्ड २०८२’ मा उक्त फिल्म उत्कृष्ट घोषित भएको हो। समाजले २०८२ मा प्रदर्शनमा आएका नेपाली चलचित्रहरूको अध्ययन, प्राविधिक विश्लेषण तथा वस्तुनिष्ठ मूल्यांकनका आधारमा विभिन्न विधामा उत्कृष्ट स्रष्टा र फिल्म छनोट गरेको जनाएको छ।

उक्त फिल्मका निर्देशक नवीन चौहानले उत्कृष्ट निर्देशक अवार्ड पाएका छन्। उत्कृष्ट अभिनेता अवार्ड ‘भूठान’का हरिवंश आचार्यले जितेका छन् भने उत्कृष्ट अभिनेत्रीको अवार्ड ‘रमिताको पिरती’की आना शर्माले प्राप्त गरेकी छन्।

साथै नवीन चौहान र सुरज कटुवालले ‘ऊनको स्वीटर’का लागि उत्कृष्ट पटकथा पुरस्कार प्राप्त गरेका छन्।

त्यसैगरी ‘भूठान’का सुशन प्रजापति उत्कृष्ट छायाङ्कन र अञ्जय खड्का उत्कृष्ट सम्पादनतर्फ पुरस्कृत भएका छन्। ‘ऊनको स्वीटर’का कोबिद बज्र उत्कृष्ट पार्श्व संगीत विधामा विजेता बनेका छन्।

फिक्सनका अध्यक्ष सामीप्यराज तिमल्सिनाले समाजले २०८१ र २०८२ सालका अवार्ड संयुक्त रूपमा एक भव्य समारोहबीच वितरण गर्ने तयारी गरिरहेको जानकारी दिए। मूल्याङ्कन प्रक्रिया सम्पन्न भइसकेकाले पारदर्शिता र व्यावसायिक धर्मलाई मध्यनजर गर्दै नतिजा सार्वजनिक गरिएको उनले बताए।