पाकिस्तानको मध्यस्थतामा अमेरिका र इरानबीच युद्ध अन्त्यको सहमति, इजरायल रुष्ट

अमेरिका र इरानबीच जारी युद्ध अन्त्य गर्ने विषयमा एक ऐतिहासिक सहमति भएको छ। पाकिस्तानको मध्यस्थतामा भएको यस सम्झौतासँगै लामो समयदेखि तनावग्रस्त रहेको यस क्षेत्रमा सैन्य कारबाही रोकिने विश्वास गरिएको छ।

अमेरिकी राष्ट्रपति डोनाल्ड ट्रम्पले यस सम्झौताको स्वागत गर्दै विश्वकै प्रमुख व्यापारिक मार्ग मध्येको एक हर्मज जलामर्ग अब पुन: सञ्चालनमा आउने घोषणा गरेका छन्। पाकिस्तानले मध्यस्थता गरेको यस फ्रेमवर्क सम्झौताले लेबनानसहित सबै मोर्चामा सैन्य अपरेशनहरू बन्द गर्ने आधार तयार पारेको छ।

आफ्नो देशमा आगामी नोभेम्बरमा हुन लागेको मध्यावधि चुनाव र अलोकप्रिय बन्दै गएको महँगो युद्धको दबाबका बीच ट्रम्पले यो कदम चालेका हुन्।

सम्झौता इजरायल र स्वतन्त्र विश्वका लागि घातक: इजरायली मन्त्री स्मोट्रिच

यसैबीच, इजरायलले भने यस सम्झौताप्रति कडा आपत्ति जनाएको छ। इजरायलका कट्टर दक्षिणपन्थी अर्थमन्त्री बेजलेल स्मोट्रिचले यो सम्झौता ‘इजरायल र सम्पूर्ण स्वतन्त्र विश्वका लागि खराब ‘ रहेको टिप्पणी गरेका छन्।

मन्त्री स्मोट्रिचले सामाजिक सञ्जाल एक्समा लेख्दै भनेका छन्, ‘इरानी शासन ढाल्न इजरायलले आफ्नै अभियान जारी राख्नुपर्नेछ र इरानले कहिल्यै आणविक हतियार प्राप्त नगर्ने कुरा हामी आफैँले सुनिश्चित गर्नुपर्नेछ।’

उनले अमेरिका र इजरायलको संयुक्त अभियानले इरानलाई कमजोर बनाउन सफलता पाएको दाबी गर्दै यो सम्झौताले ती उपलब्धिहरूलाई बेवास्ता गरेको आरोप लगाएका छन्।

इजरायलका राष्ट्रिय सुरक्षा मन्त्री इटामार बेन-गभिरले पनि सम्झौताको विरोध गर्दै भनेका छन्, ‘हामी यो सम्झौताको साझेदार होइनौँ र यसले हामीलाई कुनै पनि हालतमा बाँध्दैन। ‘

ट्रम्प र नेतन्याहूबीच बढ्दो तिक्तता

यो सम्झौतासँगै राष्ट्रपति ट्रम्प र इजरायली प्रधानमन्त्री बेन्जामिन नेतन्याहूबीचको सम्बन्धमा पनि चिसोपन देखिएको छ। इजरायलको प्रमुख पत्रिका येडिओथ अहरोनोथ ले यसलाई ‘मुठभेड ‘ को संज्ञा दिएको छ।

इजरायललाई यस सम्झौताबारे सल्लाह नगरी केवल जानकारी मात्र दिइएको बताइएको छ। राष्ट्रपति ट्रम्पले प्रधानमन्त्री नेतन्याहूलाई ‘एकदमै कठिन मान्छे’ भन्दै टिप्पणी गरेका छन्। भ्रष्टाचारको आरोप र चुनावको दबाब झेलिरहेका नेतन्याहूका लागि भने यो युद्ध रोकिनु राजनीतिक रूपमा चुनौतीपूर्ण मानिएको छ।

लेबनानद्वारा सम्झौताको स्वागत

अर्कोतर्फ, लेबनानले भने यो सम्झौताको खुलेर प्रशंसा गरेको छ। लेबनानी राष्ट्रपति जोसेफ आउनले हिंसाको चक्र अन्त्य गरी क्षेत्रीय स्थिरताका लागि यो सम्झौता कोसेढुङ्गा सावित हुने आशा व्यक्त गरेका छन्।

लेबनानी संसदका सभामुख नबिह बेरीले पनि इजरायललाई लेबनानमाथि आक्रमण रोक्न लगाउने बुँदा सम्झौतामा समावेश गरिएकोमा अमेरिका र इरान दुवैलाई धन्यवाद दिएका छन्। सम्झौताले लेबनानमा जारी हिंसालाई पूर्णविराम लगाउने उनीहरूको विश्वास छ।