निर्माण व्यवसायीसँग पनि छलफल गर्दै प्रधानमन्त्री वालेन्द्र

काठमाडौँ: प्रधानमन्त्री वालेन्द्र शाहले निर्माण क्षेत्रमा देखिएका समस्या, समाधानका उपाय, निर्माण व्यवसायका व्यवहारिक चुनौती तथा सरकारले गर्नुपर्ने नीतिगत सहजीकरणका विषयमा आज निर्माण व्यवसायीसँग छलफल गर्दै छन्। बुधबार उद्योगी व्यवसायीहरूका छाता संगठनका प्रतिनिधिसँग छलफल गरेका प्रधानमन्त्री शाहले आज निर्माण व्यवसायीसँग छलफल गर्न लागेका हुन्।

चैत १३ गते प्रधानमन्त्री नियुक्त भएयता व्यवसायीहरूसँग छलफल नगरेका उनले अहिले भेटघाट बाक्लो बनाउन थालेका हुन्।

प्रधानमन्त्री तथा मन्त्रिपरिषद्को कार्यालयमा हुने उक्त छलफलमा नेपाल निर्माण व्यवसायी महासंघका पदाधिकारी तथा प्रतिनिधिहरू सहभागी हुनेछन्। छलफलमा महासङ्घका अध्यक्ष निकोलश पाण्डे, वरिष्ठ उपाध्यक्ष मुकेश पन्त, महासचिव शिवहरि घिमिरे, बागमती प्रदेशका उपाध्यक्ष बालकृष्ण थापा तथा महासङ्घका पूर्वअध्यक्ष एवं सल्लाहकार जयराम लामिछाने सहभागी हुने कार्यक्रम रहेको छ।

निर्माण क्षेत्रले लामो समयदेखि भुक्तानीमा ढिलाइ, ठेक्का व्यवस्थापन, लागत वृद्धिका कारण सिर्जित समस्या, कानुनी तथा नीतिगत जटिलता लगायतका विषय उठाउँदै आएको छ। आजको छलफलमा यिनै विषयमा सरकार र निर्माण व्यवसायीबीच प्रत्यक्ष संवाद हुने अपेक्षा गरिएको छ।

छलफलबाट निर्माण क्षेत्रलाई सहज बनाउने नीतिगत सुधार, विकास आयोजनाको कार्यान्वयनमा देखिएका अवरोध हटाउने उपाय तथा सरकार–निजी क्षेत्रबीचको समन्वय सुदृढ गर्ने विषयमा समेत निष्कर्ष निकाल्ने अपेक्षा गरिएको छ।