खाडीमा पुनः द्वन्द्व कच्चा तेलको भाउ बढेर पुग्यो ब्यारेलको ८० डलर

काठमाडौं। पश्चिम एसियामा अमेरिका र इरानबीच फेरि द्धन्द्ध सुरु भएपछि कच्चा तेलको भाउ उकालो लागेको छ। कच्चा तेलको भाउ बढेर ब्यारेलको ८० डलर पुगेको छ।

युद्धविराम भएर होर्मुज जलमार्गमा आपूर्ति सहज भएपछि तेलको भाउ घटेर ब्यारेलको ७० डलरमा झरेको थियो। अमेरिका र इरानबीच द्धन्द्ध बढेपछि उकालो लागेको हो।

आयल प्राइस डटकमका अनुसार ब्रेन्ट क्रुडमा कच्चा तेलको भाउ ७९.१९ डलर पुगेको छ। अमेरिकासँग द्धन्द्ध बढेपछि इरानले अर्को सूचना नभएसम्मका लागि बन्द गरिएको जनाएको छ। यता अमेरिकाले यो मार्गबाट जहाजहरू आवतजावत गरिरहेको दावी गरेको छ।

मध्यपूर्वमा अमेरिकी फौज हेर्ने यूएस सेन्ट्रल कमाण्ड (सेन्टकम)ले यो जलमार्ग इरानको नियन्त्रण नरहेको बताएको छ। उसले नियमपूर्वक पार गर्न चाहने सबै जहाजका लागि होर्मुज जलमार्ग खुला रहने दाबी गरेको छ।

तेहरानले होर्मुज जलमार्ग भएर गइरहेका पानीजहाजमा हमला गरेपछि अमेरिकाले इरानमाथि नयाँ आक्रमण सुरु गरेको थियो।

इरानको इस्लामिक रेभलुशनरी गार्ड कोर (आईआरीसी) ले अर्को सूचना जारी नभएसम्मका लागि उक्त जलमार्ग बन्द गरिएको जनाएको थियो।

आईआरजिसीले कतार, कुवेत, जोर्डन र बाहरेनमा रहेका अमेरिकी सैन्य अड्डाहरूलाई लक्षित गरेको बताएको छ।

कूल तेल आपूर्तिमा होर्मुज जलमार्गको हिस्सा २० प्रतिशत रहेको छ। पूर्वि एसियाली मुलुकमा यही मार्गबाट कच्चा तेल आपूर्ति हुँदै आएको छ।