अमेरिका इरान पुनः युद्धको असरः कच्चा तेलको भाउ बढेर ब्यारेलको ९० डलर नजिक

काठमाडौं। पश्चिम एसियामा अमेरिका र इरानबीच चर्किएको सैन्य अभियानले विश्व बजारमा कच्चा तेलको भाउ बढेको छ। अमेरिका र इरानबीच युद्ध विरामपछि कच्चा तेलको भाउ घटिरहेको थियो।

द्धन्द्ध पुनः सुरु भएपछि कच्चा तेलको भाउ बढेर ब्यारेलको ९० डलर नजिक पुगेको छ। यसअघि ब्यारेलको ७० डलर हारहारीमा कच्चा तेलको कारोबार भएको थियो।

आयल प्राइस डटकमका अनुसार कच्चा तेलको भाउ बढेर ब्यारेलको ८८.१० पुगेको छ। युद्धविराम नभए तेलको भाउ बढेर ब्यारेलको १०० डलर माथि पुग्ने संभावना बढेको छ।

यसअघि कच्चा तेलको भाउ बढेर ब्यारेलको १२० डलरमाथि पुगेको थियो। सन् २०२२ देखि सुरु भएको रुस युक्रनबीच युद्धका बेला कच्चा तेलको भाउ बढेर ब्यारेलको १४० डलरसम्म पुगेको थियो। यसको गम्भीर असर पूर्वी एसियाली मुलुकलाई पर्नेछ।

इरानी बन्दरगाहतर्फ आउने–जाने जहाजहरू रोक्ने उद्देश्यसहित नौसैनिक नाकाबन्दी पुनः लागू गरेपछि वासिङ्टन र तेहरानबीचको तनाव थप चुलिएको छ। इरानी पक्षले यस कदमले युद्धविराम तथा शान्ति वार्ताका लागि भएको सहमति प्रभावकारी रूपमा समाप्त भएको जनाएको छ।

अमेरिकी राष्ट्रपति डोनाल्ड ट्रम्पले तेहरानले वार्तामा नआए इरानका विद्युत उत्पादन केन्द्र र रणनीतिक पुलहरूलाई लक्षित गरी आक्रमण अझ विस्तार गरिने चेतावनी दिएका छन्।

फक्स न्युजसँगको अन्तर्वार्तामा उनले इरान वार्तामा सहमत नभएसम्म ऊर्जा पूर्वाधार र पुलहरू निष्क्रिय बनाउने अभियान जारी रहने बताएका छन्। यसअघि हर्मुज जलघाँटी हुँदै आवतजावत गर्ने जहाजमाथि अतिरिक्त शुल्क लगाउने योजना भने उनले फिर्ता लिएका छन्।

इरानको इस्लामिक रिभोलुसनरी गाड्र्सले अमेरिकाले आफ्नो आक्रमणकारी गतिविधि अन्त्य नगरेसम्म विश्वकै प्रमुख ऊर्जा पारवहन मार्गमध्ये एक हर्मुज जलघाँटी बन्द रहने चेतावनी दिएको छ।

गत फेब्रुअरीको अन्त्यदेखि जारी अमेरिका–इरान द्वन्द्वका कारण खाडी क्षेत्रबाट हुने तेल तथा ग्यास ढुवानीमा गम्भीर असर परेको छ।

विशेषगरी विश्व ऊर्जा आपूर्तिको महत्वपूर्ण मार्ग मानिने हर्मुज जलघाँटीमा अवरोध उत्पन्न भएपछि अन्तर्राष्ट्रिय ऊर्जा बजारमासमेत चिन्ता बढेको छ। यो मार्गबाट कूल मागको २० प्रतिशत तेल आपूर्ति हुने गरेको छ।