भुसाल ग्रुपको बनाइरहेको र्‍याडिसन होटलमा नयाँ लगानीकर्ताको प्रवेश, एक अर्ब २० करोड लगानी

काठमाडौँ: व्यावसायिक घराना भुसाल ग्रुपले भैरहवामा बनाइरहेको पाँचतारे होटल र्‍याडिसनमा नयाँ लगानीकर्ताको प्रवेश भएको छ। सुस्त गतिमा निर्माण भइरहेको र्‍याडिसन होटलमा गरिमा होल्डिङ्ग्स लिमिटेड र रारा इको इन्भेष्टमेन्ट लिमिटेडको प्रवेश भएको हो।

गरिमा र रारा दुवै समूहको जलविद्युत र बैंकलगायतको क्षेत्रमा ठूलो लगानी रहेको छ। दुई नयाँ लगानीकर्ताको प्रवेशपछि ३३ प्रतिशत भुसाल ग्रुप, ३३ प्रतिशत रारा इको र ३३ प्रतिशत गरिमाको स्वामित्व हुने गरी लगानी संरचना बनाइएको छ।

होटलको विकासकर्ता अनन्त हस्पिटालिटी लिमिटेड रहेको छ। होटलको आधा काम सकिएको छ। बाँकी काम आगामी डेढ वर्षमा सञ्चालनमा ल्याइने एक सञ्चालकले नेपाल क्लिक्सलाई जानकारी दिए। नयाँ लगानीकर्ताको प्रवेशपछि होटलको अध्यक्षको जिम्मेवारी कदम केसीले पाएका छन्।

नयाँ लगानीकर्ताले होटलमा एक अर्ब २० करोड रुपैयाँ लगानी गर्ने भएका छन्। जसअनुसार गरिमाले ६० करोड र रारा इकोले ६० करोड रुपैयाँ लगानी गर्ने भएका हुन्।

होटलमा नयाँ लगानीकर्ता प्रवेशपछि निर्माणले गति लिएको छ। आगामी डेढ वर्षभित्र होटल सञ्चालनमा ल्याउने तयारी भएको एक सञ्चालकले बताए। होटल बनाउन तीन अर्ब रुपैयाँ लाग्ने भएको छ।

होटलमा नयाँ लगानीकर्ताको प्रवेशसँग एभरेष्ट बैंकले पनि एक अर्ब १० करोड रुपैयाँ ऋण लगानीको सम्झौता गरेको छ। बैंक र विकासकर्ता अनन्त हस्पिटालिटीबीच ऋण लगानी सम्झौता भइसकेको छ।

होटलमा ऋण भन्दा पनि स्वपुँजी (इक्विटी) बढी लगानी हुने भएको छ। जसअनुसार ६५ प्रतिशत संस्थापकको इक्विटी र बाँकी ३५ प्रतिशत बैंकको ऋण हुने गरी लगानी संरचना बनाइएको छ।

लगानीकर्ताहरूको होटल बिजनेस पहिलो हो। होटल बिजनेस नयाँ भएकाले ऋण भारको जोखिम कम लिन स्वपुँजी बढी लगानी गर्ने ती सञ्चालकले जानकारी दिए। पछिल्लो समय होटल व्यवसायले समस्या भोगेका कारण ऋण कम लिएको उनको भनाई छ।

होटलको फ्रेन्चाइज र सञ्चालन तथा व्यवस्थापनको जिम्मा र्‍याडिसनले लिएको छ। र्‍याडिसन ब्राण्डमा होटल सञ्चालन हुने भएको छ। होटल नेपाल–भारत सीमा भैरहवाको बेलैयामा निर्माण भइरहेको छ।

यसअघि भुसाल ग्रुपले मेगा होटलको नाममा सञ्चालनमा ल्याउने तयारी गरेको थियो। होटलको सुरुवाती लागत एक अर्ब २० करोड रुपैयाँ अनुमान गरिएको थियो। कोभिड महामारीले समय थपिएपछि लागत बढेर डेढ अर्ब रुपैयाँसम्म पुगेको थियो।

साढे दुई बिघा क्षेत्रफलमा फैलिएको सो होटल एट सेपमा निर्माण भइरहेको छ। होटलमा ११७ वटा कोठाहरू हुने छन्। एउटा प्रेसिडेन्टल रुमसहित १६ वटा स्विट र बाँकी डिलक्स खालका रुम रहने भएका छन्।

होटलमा तीन रेष्टुराँ, झण्डै हजार जना अट्ने बैंक्वेट हल, दुई मिटिङ हल, स्पा, स्वीमिङ पुल,क्यासिनोका साथै स्पोर्टस सेन्टर रहने छ। गौतमबुद्ध अन्तर्राष्ट्रिय विमानस्थलबाट २० मिनेटमा होटल पुग्न सकिनेछ। भुसाल ग्रुपले एक अर्ब रुपैयाँ लगानीमा विशाल सिमेन्ट खरिद गरेको थियो। पछि उक्त सिमेट उद्योग बिक्री गरिसकेको छ।

भुसाल ग्रुप हेभी इक्विपमेन्ट, ट्राभल एजेन्सी, एजुकेसन कन्सल्टेन्सी, केवल उद्योग, प्लाइ उद्योगमा लगानी रहेको छ।