कामना सेवा विकास बैंकको खुदनाफा साढे ३३ प्रतिशत बढ्यो, वितरणयोग्य नाफा ६० करोड

काठमाडौं। कामना सेवा विकास बैंकले गत आर्थिक वर्ष २०८२/०८३ को चौथो त्रैमाससम्म उल्लेख्य वित्तीय सुधार गरेको छ। बैंकले सार्वजनिक गरेको वित्तीय विवरणअनुसार समीक्षा अवधिमा खुद नाफा ३३.५० प्रतिशत बढेर ८९ करोड ४१ लाख ७८ हजार रुपैयाँ पुगेको छ।

अघिल्लो आर्थिक वर्षको सोही अवधिमा बैंकको खुद नाफा ६६ करोड ९७ लाख ५१ हजार रुपैयाँ थियो। बैंकका अनुसार लागत घट्नु र खुद ब्याज आम्दानीमा भएको सुधारले नाफा बढाउन सहयोग पुगेको हो।

समीक्षा अवधिमा बैंकको खुद ब्याज आम्दानी ३.९८ प्रतिशत बढेर दुई अर्ब ४१ करोड आठ लाख रुपैयाँ पुगेको छ। गत आर्थिक वर्षको चौथो त्रैमाससम्म यस्तो आम्दानी दुई अर्ब ३१ करोड ८४ लाख ९४ हजार रुपैयाँ थियो।

नाफामा भएको वृद्धिसँगै बैंकको प्रतिसेयर आम्दानी (ईपीएस) पनि बढेको छ। अघिल्लो वर्षको तुलनामा ३ रुपैयाँ ६७ पैसाले वृद्धि हुँदै ईपीएस २२ रुपैयाँ ७५ पैसा पुगेको बैंकले जनाएको छ।

बैंकको सञ्चालन नाफा पनि ३२.८७ प्रतिशत बढेर एक अर्ब ३८ करोड २५ लाख रुपैयाँ पुगेको छ। त्यस्तै, वितरणयोग्य मुनाफा ६० करोड ११ लाख रुपैयाँ कायम भएको छ। उक्त नाफालाई आधार मान्दा बैंकको लाभांश क्षमता करिब १५.१६ प्रतिशत देखिन्छ।

यस अवधिमा बैंकको प्रोभिजनिङ रकम घटेको छ। असार मसान्तसम्म बैंकले १३ करोड ६५ लाख रुपैयाँ प्रोभिजनिङ गरेको छ। प्रोभिजनिङमा आएको कमीले पनि बैंकको समग्र नाफामा सकारात्मक प्रभाव पारेको देखिन्छ।

यद्यपि, बैंकको खराब कर्जा अनुपात भने बढेको छ। अघिल्लो आर्थिक वर्षको चौथो त्रैमाससम्म ३.४९ प्रतिशत रहेको खराब कर्जा समीक्षा अवधिमा बढेर ३.७७ प्रतिशत पुगेको छ।

असार मसान्तसम्म बैंकको चुक्ता पुँजी चार अर्ब २१ करोड १९ लाख रुपैयाँ रहेको छ। बैंकको जगेडा कोषमा दुई अर्ब १४ करोड १३ लाख रुपैयाँ सञ्चित छ। बैंकले यस अवधिसम्म ६६ अर्ब ७४ करोड रुपैयाँ निक्षेप संकलन गरी ५५ अर्ब ८० करोड रुपैयाँ कर्जा लगानी गरेको वित्तीय विवरणमा उल्लेख छ।