कामना सेवा विकास बैंकको निष्क्रिय कर्जा घट्यो, वितरणयोग्य नाफा र ईपीएसमा सुधार

काठमाडौँः कामना सेवा विकास बैंक लिमिटेडको चालु आर्थिक वर्षको पहिलो त्रैमासमा वित्तीय सूचकहरूमा सुधार देखिएको छ। बैंकको निष्क्रिय कर्जा घट्नुका साथै वितरणयोग्य नाफा र प्रतिशेयर आम्दानी (ईपीएस) बढेको छ।

बैंकले सार्वजनिक गरेको चालु आर्थिक वर्षको पहिलो त्रैमाससम्मको अपरिष्कृत वित्तीय विवरणअनुसार असोज मसान्तसम्म बैंकको निष्क्रिय कर्जा अनुपात ४.४१ प्रतिशतबाट घटेर ३.९३ प्रतिशतमा झरेको छ।

निष्क्रिय कर्जा घटेसँगै बैंकको इम्पेरमेन्ट चार्जमा पनि उल्लेख्य कमी आएको छ। गत आर्थिक वर्षको पहिलो त्रैमासमा ११ करोड ६ लाख रुपैयाँ रहेको इम्पेरमेन्ट चार्ज चालु आर्थिक वर्षको सोही अवधिमा ४ करोड ९४ लाख रुपैयाँमा सीमित भएको छ।

बैंकले पहिलो त्रैमाससम्म २३ करोड ११ लाख रुपैयाँ खुद नाफा कमाएको छ। गत आर्थिक वर्षको सोही अवधिमा बैंकको खुद नाफा १९ करोड ७५ लाख रुपैयाँ रहेको थियो। यसअनुसार बैंकको खुद नाफा १६.९९ प्रतिशतले बढेको हो।

बैंकको खुद ब्याज आम्दानी १.४३ प्रतिशत बढेको छ भने खुद शुल्क तथा कमिशन आम्दानी ३०.५८ प्रतिशतले वृद्धि भएको छ। यद्यपि, कुल सञ्चालन आम्दानी भने १.१३ प्रतिशतले घटेको छ।

सञ्चालन मुनाफा भने १९.०२ प्रतिशतले बढेको छ।

त्यस्तै, समीक्षा अवधिमा बैंकको वितरणयोग्य मुनाफा १२.५३ प्रतिशतले बढेको छ। त्यस्तै, प्रतिशेयर आम्दानी २ रुपैयाँ ६७ पैसा बढेर २३ रुपैयाँ १३ पैसा पुगेको छ।

वितरणयोग्य प्रतिशेयर आम्दानी पनि १ रुपैयाँ ७५ पैसा बढेर १५ रुपैयाँ ७६ पैसा पुगेको छ।

असोज मसान्तसम्म बैंकको मूल्य आम्दानी अनुपात २०.५८ गुणा र प्रतिशेयर नेटवर्थ १६१ रुपैयाँ ८४ पैसा रहेको छ।

४ अर्ब २१ करोड १९ लाख रुपैयाँ चुक्ता पूँजी रहेको बैंकको जगेडा कोषमा २ अर्ब ३८ करोड ८३ लाख रुपैयाँ सञ्चित रहेको छ।

पहिलो त्रैमासको अन्त्यसम्म बैंकले ६७ अर्ब ९० करोड ४७ लाख रुपैयाँ निक्षेप संकलन गरेको छ। सो अवधिमा बैंकको कुल कर्जा लगानी ५६ अर्ब ३४ करोड ५३ लाख रुपैयाँ रहेको छ।