ग्लोबल फाइनान्सको उत्कृष्ट बैंकको सूचीमा लगातार तेस्रो वर्ष ग्लोबल आईएमई बैंक

काठमाडौँः नेपाली बैंकिङ क्षेत्रको अन्तर्राष्ट्रिय पहिचान विस्तार गर्दै ग्लोबल आईएमई बैंकले ‘बेस्ट बैंक नेपाल–२०२६’ अवार्ड प्राप्त गरेको छ। अन्तर्राष्ट्रिय आर्थिक पत्रिका ग्लोबल फाइनान्सले प्रदान गर्ने यो अवार्ड बैंकले लगातार तेस्रो वर्ष जितेको हो।

बैंकले सन् २०२४ र २०२५ मा पनि यही सम्मान प्राप्त गरेको थियो। यससँगै ग्लोबल आईएमई बैंक लगातार तीन वर्ष उक्त अवार्ड पाउने नेपाली बैंक बनेको छ।

थाइल्यान्डको राजधानी बैंककमा आयोजित समारोहमा ग्लोबल फाइनान्सका प्रतिनिधिले बैंकका नायब प्रमुख कार्यकारी अधिकृत सुमन पोखरेल र दीपचन्द्र रेग्मीलाई अवार्ड हस्तान्तरण गरेका थिए।

ग्लोबल फाइनान्सले बैंकको वित्तीय क्षमता, डिजिटल पहुँच, ग्राहक सेवामा नवीनता, प्रविधि तथा कृत्रिम बुद्धिमत्ताको प्रयोग, दिगो कर्जा प्रवाह र जोखिम व्यवस्थापनलाई मूल्याङ्कनको आधार बनाएको जनाएको छ।

विश्वका विभिन्न देशका प्रमुख वित्तीय संस्थालाई सम्मान गरिएको समारोहमा नेपालको ग्लोबल आईएमई बैंक पनि छनोट भएको हो। बैंकका अनुसार यस प्रकारको अन्तर्राष्ट्रिय सम्मानले नेपाली बैंकिङ क्षेत्रको पहिचान विस्तार गर्न सहयोग पुर्‍याउनेछ।

ग्लोबल आईएमई बैंकले यसअघि पनि विभिन्न राष्ट्रिय तथा अन्तर्राष्ट्रिय पुरस्कार प्राप्त गरिसकेको छ। लगातार तीन वर्ष एउटै अवार्ड प्राप्त गर्नुलाई बैंकले आफ्नो सेवा, प्रविधि र संस्थागत क्षमताको उपलब्धिका रूपमा लिएको छ।