‘महादेव! धनको बिटो पठाइदेऊ, खाली भयो जेब’

काठमाडौँ: हरितालिका तीजको अवसर पारेर नयाँ तीज गीत ‘महादेव! खाली भयो जेब’ सार्वजनिक भएको छ। गायिका एलिना चौहानको स्वर रहेको गीतको शब्द तथा संगीत कस्तुप पन्तको रहेको छ। यस्तै स‌ंगीत संयोजन भने रमेश सेन्चुरीले गरेका छन्।

गीतको सुरुवात ‘हर हर महादेव, अरूको आश छैन, तिम्रै शिरभर’ बोलबाट हुन्छ। भगवान् शिवप्रतिको आस्था व्यक्त गर्दै सुरु हुने गीतले आधुनिक युवतीहरूको चाहना, प्रेम, सौन्दर्यप्रतिको आकर्षण, बढ्दो महँगी र आर्थिक अभावका विषयलाई व्यंग्यात्मक तथा मनोरञ्जनात्मक शैलीमा प्रस्तुत गरेको छ।

आफू पनि गुडियाजस्तै राम्रो देखिन चाहने युवतीको मनोभाव, युवावस्थाको चञ्चलता, सुनको बढ्दो मूल्यका कारण गहना बनाउन नसकिएको अवस्था, आइफोन र टिकटक संस्कृतिप्रतिको आकर्षण तथा धन अभावले सपना पूरा गर्न नसकिएको पीडालाई गीतमा समेटिएको छ।

गीतको भिडियो स्मृति तिमिल्सिना ‘गुरुआमा’को निर्देशन तथा कोरियोग्राफीमा तयार भएको हो। भिडियोमा एलिना रायमाझी र पार्वती श्रेष्ठको अभिनय रहेको छ। भिडियोलाई करण चैसिरले छायांकन गरेका हुन् भने विनोद बामले सम्पादन तथा रङ संयोजन गरेका छन्।