बाह्य लगानी भित्र्याउने विवादस्पद प्रस्ताव फिफाद्वारा फिर्ता,कारोबारको मूल्यांकन २० अर्ब डलर

काठमाडौं। विश्व फुटबलको सर्वोच्च निकाय फिफाले आफ्नो व्यावसायिक कारोबारमा बाह्य लगानी भित्र्याउने विवादास्पद प्रस्ताव फिर्ता लिएको छ। सदस्य राष्ट्र तथा फुटबल संघहरूको तीव्र विरोधपछि फिफाले उक्त योजना अघि नबढाउने निर्णय गरेको हो।

फिफाले विश्वकपसहितका आफ्ना प्रमुख प्रतियोगिताको व्यावसायिक व्यवस्थापन गर्न छुट्टै संस्था स्थापना गरी त्यसमा करिब २० प्रतिशत हिस्सा बिक्री गर्ने प्रस्ताव अघि सारेको थियो। यसमार्फत ४ अर्ब २० करोड डलरसम्म जुटाउने लक्ष्य राखिएको थियो। प्रस्तावअनुसार नयाँ संस्थाको मूल्यांकन २० अर्ब डलर हुने अनुमान गरिएको थियो।

मंगलबार सार्वजनिक गरिएको उक्त प्रस्तावले विशेषगरी युरोपेली फुटबल महासंघ (युइएफए) को कडा विरोध खेपेको थियो। युइएफएले बिहीबार योजनाको बहिष्कार गर्ने निर्णय गर्दै बाह्य लगानीकर्तालाई व्यावसायिक अधिकार बेच्ने प्रयासले फुटबलको ‘आत्मा नै बिक्री गर्न खोजिएको’ आरोप लगाएको थियो।

विरोध बढेपछि फिफा अध्यक्ष जियानी इन्फान्टिनोले शुक्रबार राति विज्ञप्ति जारी गर्दै प्रस्ताव कार्यान्वयन नगर्ने घोषणा गरेका छन्। उनले विभिन्न पक्षका धारणा सुनेपछि उक्त परियोजनाले अनावश्यक विभाजन सिर्जना गरेको निष्कर्षमा पुगिएको बताए।

‘हाम्रो उद्देश्य सधैं फुटबललाई एकताबद्ध बनाउने र यसको विकास गर्ने नै हो। त्यसैले यो प्रस्ताव अब अघि बढाइने छैन,’ इन्फान्टिनोले विज्ञप्तिमा उल्लेख गरेका छन्। यसैबीच, शुक्रबार नै इन्फान्टिनोका वरिष्ठ सल्लाहकार कार्लोस र्कोडिरोले तत्काल पदबाट राजीनामा दिएका छन्। उनले उक्त प्रस्तावलाई ‘फुटबलका लागि खराब सम्झौता’ भएको बताएका थिए।

फिफाका प्रमुख सञ्चालन अधिकृत को केभिन लोमुअरले पनि योजनाको आलोचना गर्दै कर्मचारीहरूलाई भ्रममा पारिएको र यो ‘एक व्यक्तिको परियोजना’ भएको टिप्पणी गरेका छन्।

फुटबलको व्यावसायिक भविष्यसँग जोडिएको यस प्रस्तावलाई फिर्ता लिएसँगै फिफाले अब सदस्य संघहरूबीच सहमति कायम गर्दै विश्व फुटबलको विकासका लागि नयाँ रणनीति खोज्ने संकेत दिएको छ। एएनआई