पेरुमा पर्यटक सयर गराउने विमान दुर्घटना, १३ जनाको मृत्यु

काठमाडौँः पेरुको चर्चित नाज्का लाइन्सको दृश्यावलोकन गराउने क्रममा उडेको एउटा सानो विमान दुर्घटनाग्रस्त हुँदा १३ जनाको मृत्यु भएको छ। स्थानीय अधिकारीहरूका अनुसार दुर्घटना शनिबार नाज्का सहरनजिक भएको हो।

दुर्घटनामा युरोपका विभिन्न देशका ११ पर्यटकसहित विमानका पाइलट र सहपाइलटको ज्यान गएको पुष्टि गरिएको छ। पेरुको यातायात मन्त्रालयका अनुसार मृत्यु हुनेमा सात इटाली, दुई स्पेन तथा दुई जर्मनीका नागरिक रहेका छन्। उनीहरूको उमेर १८ देखि ७८ वर्षबीच रहेको जनाइएको छ। साथै, पाइलट अमेरिको सालाजार र सहपाइलट इरेन्का गुआनिलो डेल कार्पियोको पनि घटनास्थलमै मृत्यु भएको छ।

स्थानीय प्रशासनका अनुसार विमान इका सहरबाट उडेको थियो। एरोडियाना कम्पनीद्वारा सञ्चालित ‘सेसना ग्रान्ड क्याराभान’ विमानले लामो समयदेखि नाज्का लाइन्सको हवाई दृश्यावलोकन सेवा सञ्चालन गर्दै आएको थियो।

नाज्का लाइन्स मरुभूमिमा प्राचीन सभ्यताले बनाएका विशाल भू–चित्रहरूको समूह हो। जनावर तथा अन्य आकृतिमा रहेका यी चित्रहरू जमिनबाट भन्दा आकाशबाट हेर्दा स्पष्ट देखिने भएकाले विश्वभरका पर्यटकका लागि प्रमुख आकर्षण मानिन्छ।

घटनापछि पेरुका राष्ट्रपति केइको फुजिमोरीले दुर्घटनाप्रति गहिरो दुःख व्यक्त गरेका छन्। उनले नाज्का विमानस्थलको सञ्चालन अस्थायी रूपमा रोक्ने विषयमा सम्बन्धित निकायको प्रतिवेदन प्राप्त भएपछि निर्णय गरिने बताएका छन्।

दुर्घटनाको वास्तविक कारण पत्ता लगाउन पेरुभियाली अधिकारीहरूले अनुसन्धान सुरु गरेका छन्। विमान सञ्चालक एरोडियाना कम्पनीले भने घटनाबारे तत्काल औपचारिक प्रतिक्रिया सार्वजनिक गरेको छैन।