गुगलको नयाँ फोल्डेबल स्मार्टफोन ‘पिक्सेल ११ प्रो फोल्ड’ सार्वजनिक हुँदै

काठमाडौं। सर्च इन्जिन गुगलले आफ्नो आगामी फोल्डेबल स्मार्टफोन पिक्सेल ११ प्रो फोल्डको पहिलो आधिकारिक टिजर सार्वजनिक गरेको छ। आगामी अगस्ट १२ मा हुने औपचारिक सार्वजनिक कार्यक्रमअघि कम्पनीले सार्वजनिक गरेको छोटो भिडियोले नयाँ डिभाइसको प्रारम्भिक झलक दिएको हो।

टिजर भिडियोमा स्मार्टफोनको बाहिरी आकृति, भित्री डिस्प्ले तथा पछाडिको क्यामेरा मोड्युल देखाइएको छ। सार्वजनिक गरिएको झलकअनुसार पिक्सेल ११ प्रो फोल्डको क्यामेरा डिजाइन अघिल्लो मोडेल पिक्सेल १० प्रो फोल्डसँग मिल्दोजुल्दो देखिन्छ।

यसअघि सार्वजनिक भएका विभिन्न लिक तथा रेन्डरहरूका अनुसार नयाँ फोल्डेबल स्मार्टफोनको डिजाइनमा ठूलो परिवर्तन नआउने अनुमान गरिएको छ।

डिभाइसमा ८ इन्चको भित्री डिस्प्ले रहने र गुगलको नयाँ टेन्सर जी ६ चिपसेट प्रयोग हुने अपेक्षा गरिएको छ। स्मार्टफोनमा ४ हजार ८०० एमएएच क्षमताको ब्याट्री रहने तथा पछाडिको क्यामेरा मोड्युलमा नयाँ ‘पिक्सेल ग्लो’ एलईडी फिचर समावेश गरिने चर्चा छ। रङ विकल्पतर्फ पिक्सेल ११ प्रो फोल्ड नयाँ पाइन रङका साथै कालो रङमा उपलब्ध हुने अनुमान गरिएको छ।

गुगलले अगस्ट १२ मा आयोजना हुने कार्यक्रममा पिक्सेल ११ प्रो फोल्डका सम्पूर्ण प्राविधिक विवरण, विशेषता, मूल्य तथा उपलब्धताबारे औपचारिक घोषणा गर्ने जनाएको छ। नयाँ फोल्डेबल स्मार्टफोनमार्फत गुगलले बढ्दो फोल्डेबल बजारमा आफ्नो उपस्थिति अझ बलियो बनाउने अपेक्षा गरिएको छ। एएनआई