बूढीगण्डकी बाढीः ३६ जनाको उद्धार

काठमाडौँः बूढीगण्डकी नदीमा आएको बाढीपछि प्रभावित क्षेत्रमा नेपाली सेनाले उद्धार, राहत तथा जोखिममा रहेका नागरिकलाई सुरक्षित स्थानमा स्थानान्तरण गर्ने कार्य जारी राखेको छ ।

नेपाली सेनाका अनुसार आइतबार दिउँसो १२ बजेसम्म गोरखाको बाढी प्रभावित क्षेत्रबाट ३६ जनाको उद्धार गरिएको छ । उद्धारका लागि एमआई–१७ सहित चारवटा हेलिकोप्टर र स्थलमार्गबाट टोली परिचालन गरिएको थियो ।

सेनाका अनुसार जगत क्षेत्रबाट ६ जना, न्याकफेदीबाट ९ जना, यारुबाट ९ जना र पायुँबाट १२ जनाको उद्धार गरिएको हो । यारुबाट उद्धार गरिएकामा एक शिशु र एक विदेशी नागरिकसमेत रहेका छन् ।

बाढी प्रभावित क्षेत्रमा अन्य सुरक्षा निकाय तथा सरकारी निकायसँग समन्वय गरी थप खोज तथा उद्धार कार्य भइरहेको नेपाली सेनाले जनाएको छ ।

बूढीगण्डकी नदीमा आएको बाढीका कारण गोरखा, धादिङ, तनहुँलगायतका जिल्ला प्रभावित भएका छन् । प्रभावित क्षेत्रमा जोखिममा परेका नागरिकको उद्धार तथा सुरक्षित स्थानमा स्थानान्तरण गर्ने कार्यलाई प्राथमिकता दिइएको छ ।