आईपीओ निष्कासन मागेका ११७ कम्पनीको वर्गीकरण सकियो, स्वीकृति कहिले?

काठमाडौँः नेपाल धितोपत्र बोर्ड (सेबोन) मा ११७ कम्पनीका ७१ अर्ब ४२ करोड रुपैयाँभन्दा बढीको प्रारम्भिक सार्वजनिक निष्कासन (आईपीओ) आवेदन प्रक्रियामा छन्। बोर्डले आवेदनलाई छ चरणमा वर्गीकरण गरे पनि कम्पनीहरूले कहिलेसम्म निष्कासन अनुमति पाउँछन् भन्ने समयसीमा भने स्पष्ट भएको छैन।

कात्तिक ११ गतेसम्मको विवरणअनुसार ती कम्पनीले ५१ करोड ९ लाख ८१ हजार ९४६ कित्ता सेयर निष्कासन गर्न अनुमति मागेका छन्। आवेदन प्रक्रियामा रहेका कम्पनीमध्ये अधिकांश प्रारम्भिक चरणमै छन्। कुल ७६ कम्पनीको आवेदन पहिलो चरणमा रहेको छ।

बोर्डको वर्गीकरणअनुसार छ कम्पनी प्रारम्भिक समीक्षामा छन् भने चार कम्पनीलाई कैफियत पठाइएको छ। त्यस्तै, १९ कम्पनीले कैफियतको जवाफ बुझाइसकेका छन्। १० कम्पनीको जवाफ समीक्षा भइरहेको छ। अन्तिम समीक्षामा भने आशुतोष इनर्जी लिमिटेड र कान्तिपुर फर्मास्युटिकल्स ल्याव लिमिटेड पुगेका छन्।

अन्तिम समीक्षामा पुगेका यी दुई कम्पनीले क्रमशः १२ लाख र १७ लाख कित्ता सेयर निष्कासन गर्न अनुमति मागेका छन्। उनीहरूको प्रस्तावित निष्कासन रकम कुल २९ करोड रुपैयाँ छ।

आवेदनलाई छ चरणमा विभाजन गर्दा कम्पनीको फाइल कुन अवस्थामा छ भन्ने बुझ्न सहज भएको छ। तर, हरेक चरण पूरा गर्न लाग्ने समय र स्वीकृति दिने सम्भावित मिति सार्वजनिक गरिएको छैन। यसले निष्कासनको तयारीमा रहेका कम्पनी र आईपीओको प्रतीक्षामा रहेका लगानीकर्ताका लागि अन्योल कायमै राखेको छ।

आईपीओ निष्कासन स्वीकृतिको क्रममा रहेका कम्पनीहरु