कोसीमा संकटः विश्वासको मत लिँदै मुख्यमन्त्री कार्की

काठमाडौं– बिहीबार अध्यादेशबाट ल्याएको बजेट प्रदेशसभामा पेस गरेर विश्वासको मतका लागि सबै पार्टीलाई पत्र लेखे पनि अन्तिम समय गायब भएका कोसी प्रदेशका मुख्यमन्त्री हिक्मतकुमार कार्कीले आज विश्वासको मत लिँदै छन्। विश्वासको मत लिने प्रस्ताव बिहीबार निर्णयार्थ प्रस्तुत नगरी शुक्रबार प्रस्तुत गर्ने गरी बैठक स्थगित भएपछि आज कार्कीको मुख्यमन्त्रीमा रहने÷नरहने छिनोफानो हुनेछ।

बिहीबारको बैठकमा विश्वासको मत लिने प्रस्ताव गरी छलफल भइसकेको अवस्थामा मुख्यमन्त्री प्रदेशसभाबाट बाहिरिएका थिए। प्रदेशसभा सचिवालयले प्रदेशसभाको तेस्रो अधिवेशनको पहिलो बैठकमा विश्वासको मत लिने प्रस्तावसँगै निर्णयार्थ प्रस्तुत हुने कार्यसूची प्रकाशन गरे पनि प्रस्ताव निर्णयार्थ पेस भएन।

मुख्यमन्त्रीले विश्वासको मत लिने प्रस्ताव प्रस्तुत गरेपछि दलका नेताहरू छलफलमा सहभागी भएका थिए। छलफका क्रममा मुख्यमन्त्रीले विश्वासको मत नपाउने देखेपछि मत विभाजनको प्रक्रिया सुरु गर्नुअघि आधा घन्टाका लागि स्थगित गरिएको थियो।

तर, मुख्यमन्त्री कार्की सोही मौकामा बाहिरिएका थिए। त्यसपछि पटक– पटक सूचना प्रकाशित गर्दै सरेको बैठक पुनः बस्न सकेन र राती अबेर सूचना टाँस गरेर शुक्रबार ११ बजेसम्मका लागि स्थगित गरिएको छ।

कोसी प्रदेशसभाका कुल ९३ सदस्यमध्ये मुख्यमन्त्री कार्कीको पक्षमा एमाले र राष्ट्रिय प्रजातन्त्र पार्टीका गरी ४६ जनाको समर्थन छ। एक सांसद रहेको जनता समाजवादी पार्टी तटस्थ बस्दा विपक्षीतर्फ कांग्रेसका २९, नेकपा माओवादी केन्द्रका १३, नेकपा एसका चार गरी ४६ मत देखिएको छ।

मुख्यमन्त्रीमा जोगिन कार्कीलाई ४७ मत आवश्यक पर्छ। एमालेका कार्कीले कोसीमा मुख्यमन्त्री चलाइरहेका पनि पद धरापमा पर्ने देखिएको छ।