काठमाडौँ महानगरको ‘आइडिया बैंक’मा छानिन १०१ समूहले दिए प्रस्तुति

काठमाडौँ– काठमाडौँ महानगरपालिकाको आइडिया बैंकका लागि ५० समूह छान्नका लागि प्रस्तुति सकिएको छ। महानगरअन्तर्गतको सहरी योजना आयोगले काठमाडौँ मेट्रो आइडिया एण्ड इनोभेसन्स (केएमआइआइ) २०८० का अन्तिम ५० समूहमा छानिनका लागि १०१ समूह तथा व्यक्तिले प्रस्तुति दिएका हुन्।

तीन दिनसम्म चलेको प्रस्तुतिमा प्रस्तुतीमा निर्णायकसमक्ष आइडिया, यससँग प्रविधि र साझेदारसँगको सम्बन्ध, व्यावसायिक सम्भावना लगायत विषयबारे जानकारी दिनुपर्ने थियो। प्रस्तुतीका लागि सबै समूहले ५-५ मिनेटको समय पाएका थिए।

समुदाय र वातावरण विधामा ३२, प्रशासनिक प्रभावकारितामा ७ वटा, सामुदायिक सेवामा २३ वटा, आर्थिक सामाजिक क्षेत्रमा १९ वटा र सहरी पूर्वाधारमा २० वटा गरी १०१ सोच छानिएका थिए। यसमा ७८ वटा समूह र २३ जना व्यक्ति छन्।

२०८० जेठ २ गते पहिलो पटक सूचना प्रकाशित गरेर आवेदन आव्हान गरिएको थियो । यसका लागि जेठ १९ गतेसम्म समय तोकिएको थियो। यस अवधिमा प्रस्ताव पठाउन नसकेकालाई १० दिनको समय थप गरिएको थियो। आइडिया बैंकका लागि ७८६ जनाले आवेदन दिएका थिए।

‘नविनतम सोचलाई उद्यमशील क्षेत्रका रुपमा विकास गर्न विकास कार्यमा सहयोग गर्ने, विकसित सोचलाई लगानीकर्तासँग जोडेर वेरोगजारसँग सम्बन्धित समस्या कम गराउने यसको लक्ष्य हो,’ सहरी योजना आयोगका सदस्य प्रतीक अधिकारीले भने।