अवरुद्ध संसद् खुलाउन सभामुख सक्रिय, के होला आजको प्रतिनिधिसभा बैठक?

काठमाडौं– गत बुधबारदेखि प्रमुख प्रतिपक्षी एमालेलगायत दलले अवरोध गर्दै आएको संघीय संसद्अन्तर्गत प्रतिनिधिसभा बैठक आज पनि बस्ने कार्यसूची संसद् सचिवालयले सार्वजनिक गरेको छ। प्रचण्डले गत सोमबार सरदार प्रितम सिंहको पुस्तक रोड्स टु द भ्याली विमोचन कार्यक्रममा नेपालमा प्रधानमन्त्री बन्न दिल्ली दौडिनुपर्ने विवादास्पद अभिव्यक्ति दिएपछि प्रतिपक्षी एमालेले प्रधानमन्त्रीको राजीनामालाई एकसूत्रीय माग बनाएर संसद् अवरुद्ध गर्दै आएको छ।

संसद् अवरोधकै कारण मिटरब्याज विधेयक पारित हुन नसक्दा २४ हजार पीडितको निवेदन बेवारिसे बनेको छ। आज दिउँसो १ बजे बस्ने बैठकमा मिटरब्याजसम्बन्धी प्रतिस्थापन विधेयक पेस गर्ने कार्यसूची छ।राष्ट्रिय सभामा उत्पत्ति भएको नेपाल विश्वविद्यालय विधेयक, २०८० सम्बन्धमा राष्ट्रिय सभाबाट प्राप्त सन्देशसहितको विधेयक टेबुल गरिने कार्यसूची छ।

प्रतिनिधिसभा बैठकमा केही नेपाल ऐन संशोधन गर्न बनेको विधेयक, २०८० लाई प्रस्तुत गर्न अनुमति माग्ने कार्यसूची छ। सांसद ज्ञानबहादुर शाही, रास्वपा सांसदद्वय सोविता गौतम र सुमना श्रेष्ठबाट प्राप्त विरोधको सूचनालाई निर्णयार्थ प्रस्तुत गरिने कार्यसूची संसद् सचिवालयले सार्वजनिक गरेको छ।

संसद् अवरोध नभए कानुनमन्त्री धनराज गुरुङले राष्ट्रिय सभामा उत्पत्ति भएको मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८० माथिको दफावार छलफल सदनमा गरियोस् भनेर प्रस्ताव प्रस्तुत गर्ने सम्भावित कार्यसूचीमा उल्लेख गरिएको छ।

तर, एमाले नेता गोकर्ण विष्ट आजको संसद् बैठक पनि अवरुद्ध गरिने बताउँछन्। प्रधानमन्त्री प्रचण्डले संसद् बैठकमा माफी माग्नुपर्ने र राजीनामा दिए मात्रै बैठक चल्न दिइने उनको भनाइ छ।

संसद् अवरोध हटाउन सभामुख घिमिरेको आग्रह

प्रतिनिधिसभाका सभामुख देवराज घिमिरेले संसद अवरोधलाई छलफलको माध्यमबाट समाधान गरेर मात्र सदन अघि बढ्ने बताए छन्। संसद्मा विषय उठिसकेपछि वार्ताको माध्यमबाट समाधान गरेर मात्र संसदलाई गति दिन उचित हुने उनको धारणा छ।

सभामुख कसैको पक्ष वा विपक्षमा नरहने हुँदा संसद्मा कोलाहल हुन दिनुभन्दा वार्ताका माध्यमबाट समस्या समाधान गरी अघि बढ्न मध्यस्थताको भूमिका वहन गरिरहेको सभामुख घिमिरले दाबी गरे। प्रधानमन्त्रीलाई सम्पर्क गरी प्रतिपक्ष दलसँग वार्तामा बसेर समस्या समाधान गरी संसद् चलाउन आग्रह गरेको उनको भनाइ छ। प्रमुख प्रतिपक्षी एमाले नेतालाई सीधै प्रधानमन्त्रीको राजीनामा माग्नुभन्दा वार्तामार्फत समस्या समाधानका लागि अग्रसर हुन सुझाएको सभामुखले बताए।

‘सभामुखको भूमिका संसदमा तटस्थ हुनुपर्छ। यसबारे म सचेत छु। संसद् झगडा गर्ने थलो बन्नुहुन्न’, सभामुख घिमिरेले भने। निरन्तर संसद् अवरोध हुँदा राजनीतिक दल र नेताहरुले नै जनतालाई जवाफ दिनुपर्ने हुँदा समस्या समाधानका लागि नियमित आग्रह गरिरहेको सभामुख घिमिरे बताउँछन्।

बिहीबार पनि सभामुख घिमिरेले प्रमुख दलका मुख्य सचेतक र सचेतकलाई सिंहदरबार कार्यालयमा डाकेर संसद् गतिरोध हटाउने उपायबारे विमर्श गरेका थिए। बैठकमा सत्तापक्षबाट सहभागीले प्रतिपक्षलाई गाली गरेका थिए भने प्रतिपक्षले सत्तापक्षलाई सरापेका कारण कुनै पनि सहमति जुट्न सकेको थिएन। सोही कारण संसद् बैठक आजका लागि सरेको थियो।