तीन दलका शीर्ष नेता फेरि भेट्ने, जुट्ला त सहमति?

काठमाडौं–सदनको अवरोध हटाउने सन्दर्भमा प्रमुख तीन दलका शीर्ष नेताले फेरी छलफल गर्ने भएका छन्। आइतबार मध्यान्न भएको छलफलबाट सदनमा प्रधानमन्त्री पुष्पकमल दाहालको स्पष्टिकरण दिने र प्रमुख प्रतिपक्षी नेकपा एमालेले पनि सुन्ने सहमति जुटेको थियो। तर, आइतबारको प्रतिनिधिसभा बैठक भोलीका लागि सरेको छ।

एमाले सहमतिबाट पछि हटेका कारण बैठक स्थगित भएको आरोप सत्तारुढ दलहरुले लगाइरहेका छन्। यही अवस्थाकाबीचमा प्रधानमन्त्री प्रचण्ड, नेपाली कांग्रेसका सभापति शेरबहादुर देउवा र प्रमुख प्रतिपक्षी दल नेकपा एमालेका अध्यक्ष केपी शर्मा ओलीबीच पुनः भेट हुन लागेको हो। यद्यपी छलफल आजै हुने वा भोली भन्ने चाहिँ टुंगो लाग्न बाँकी रहेको बताइएको छ।

केही दिन अघि आफूलाई प्रधानमन्त्री बनाउन सरदार प्रितम सिंह पटक–पटक दिल्ली गएको भनेर अभिव्यक्ति दिएपछि प्रधानमन्त्री दाहाल विवादमा फसेका छन्। उनको अभिव्यक्तिलाई लिएर एमालेले सदन अवरोध गर्दै आएको छ। एमालेले प्रधानमन्त्रीको राजिनामा समेत माग्दै आएको छ।