क्रिकेटमा चुनावी चहलपहलः जिल्लाले विधानको फरक व्याख्या गरेको लामाको ठहर

काठमाडौं – नेपाल क्रिकेट संघ(क्यान) मा चुनावी चहलपहल सुरु भएको छ। केही दिन अघि मात्र नेपाली राष्ट्रिय क्रिकेट टिमका पूर्वकप्तान पारख खड्काले सामाजिक सञ्जालमा एक भिडियो पोस्ट गर्दै जिल्लाको साधाराणभाबारे आफ्नो धारण बताएका थिए।

त्यसको केही दिनमा(आज) क्यानकै सदस्य छुम्बी लामाले जिल्लामा क्यानको विधानको फरक फरक व्याख्या गरेको भन्दै आफ्नो ध्यानाकर्षण भएको बताएका छन्।

क्यानले खेलकुद ऐन २०४८ अनुसार वि सं २०५५ मा आफ्नो विधान बनाएको थियो। त्यसको तीन संशोधन सम्पन्न भएको छ। त्यस्तै, भर्खरै मात्र क्यानको साधरण सभा पनि सम्पन्न भएको छ। त्यसमा, त्यो क्यानको विधानको चौथो शंसोधन थियो जहाँ विधानलाई राष्ट्रिय खेलकुद विकास ऐन २०७७ अनुसार बनाइएको थियो।

यो विधानलाई अहिले राखेपले पनि प्रमाणिकरण गरिसकेको सदस्य छुम्बी लामाले जानकारी दिएका छन्। तर विधानको बारेमा जिल्ला संघहरुले स्पष्ट निर्देशन दिन नसकेको कारण आफ्ना ध्यानाकर्षण भएको लामाले सामाजिक सञ्जालमार्फत् जनाएका छन्।

‘जिल्लाहरुमा सदस्यता नवीकरण र नयाँ सदस्य वितरणको कार्य भईरहेको अवस्थामा विधानको बारेमा संघबाट प्रष्ट निर्देशन नहुदा जिल्ला संघहरुले विधानबारे छुट्टाछुट्टै व्याख्या गरी सूचना जारी भएको छ,’ उनले सामाजिक सञ्जालमा लेखेका छन्।

संघको विधानभन्दा बहिर कोही पनि हुन सक्दैन भन्दै लामाले यथाशिघ्र विधान अनुसार नेपाल क्रिकेट संघले सबै जिल्ला क्रिकेट संघहरुलाई विधानअनुसार प्रष्ट निर्देशन दिइ नयाँ सूचना जारी गर्नको लागि लामाले अनुरोध गरेका छन्।

यसअघि पूर्वकप्तान खड्काले जिल्ला देखि नै नेपाली क्रिकेटको संरचना फेरबदल गरेर अघि जानुपर्ने बताएका थिए। उनले दुई वर्षअघि अन्तर्राष्ट्रिय क्रिकेटबाट संन्यासको घोषण गरेका थिए।