खाणको पक्षमा ध्रुव वाग्ले

काठमाडौँ– नेपाली कांग्रेसका केन्द्रीय सदस्य ध्रुव वाग्ले नक्कली भूटानी शरणार्थी प्रकरणमा पुर्पक्षका लागि थुनामा रहेका पूर्वगृहमन्त्री बालकृष्ण खाणको पक्षमा खुलेका छन्। नेपाली कांग्रेस केन्द्रीय समिति बैठकमा बोल्दै उनले खाणको पक्षधरता प्रकट गरेका हुन्।

‘बालकृष्णजी अहिले जेलमा छन्। उहाँ जेल जाँदा दुख लागेको छ। अदालतको फैसलाले मात्रै दोषि हुने हो। हामिले न्यायलयको निर्णय कुर्नुपर्छ कि पर्दैन?,’ उनको भनाइ छ।

नयाँ पार्टी फेस भ्यालू बढाउने काममा लागेको उनको भनाइ थियो। तर तिनको रियल भ्यालू नभएको बताएका थिए। नयाँ पार्टीको बाछिटा कांग्रेसमा पनि आएकोमा उनको दुखेसो थियो। ‘रियल भ्यालू बढाउनुभन्दा फेस भ्यालू बढाउन नेताहरु लाग्नुभएको छ। फेस भ्यालूले हामीले काहिँ पनि पुर्‍याउँदैन,’ उनले भने।

कांग्रेसका विरुद्ध सामाजिक सञ्जालमा अभियान छेडिए र सामाजिक सञ्जालमा फजुल शब्दको आतिशबाजीबाट डराउनुपर्ने अवस्था सिर्जना भएको उनको ठहर थियो। कांग्रेसका नेताले आफ्नै नेताको मजाक गरेर उडाएको भन्दै उनले आक्रोश व्यक्त गरे। ‘त्यसले पार्टीको गरिमा बढ्दैन। अहिले पार्टीमा सुधार जरुरी छ। रुपान्तरण, पुस्तान्तरण र हस्तान्तरणका कुरा आएका छन्,’ उनले व्यंग्य पनि सँगै कसे।