केन्द्रमा बसेर सदस्यता थप्ने कुरा ठिक होइन, तलै जिम्मा दिऔं : मीनेन्द्र रिजाल

काठमाडौँ– नेपाली कांग्रेसका केन्द्रीय सदस्य मीनेन्द्र रिजालले केन्द्रमा बसेर वडामा सदस्यता थप गर्ने कुरा उचित नभएको टिप्पणी गरेका छन्। महामन्त्री गगन थापाले पेस गरेको कार्ययोजनमा ७ लाख सदस्यता थप गर्ने प्रस्तावप्रति लक्षित गर्दै नेता रिजालले यस्तो टिप्पणी गरेका हुन्।

‘पार्टीको आधार निर्माण गर्न केन्द्रमा बसेर सदस्यता थप्ने कुरा ठिक होइन। तलैलाई जिम्मा दिऔं,’ उनको प्रस्ताव छ, ‘ आत्तिएको भावबाट पार्टी बन्दैनौं। ७ प्रतिशत मत लुज गरेका छौं। सरकार तीन तहमा त्यसलाई प्रयोग गरौं र योजना बनाऔं।’

पार्टीको बैठक सदैव लाइभ हुन नसक्ने बताएका उनले निर्वाचन प्रणाली प्रतिनिधिमूलक हुन नसकेको टिप्पणी गरे। उनले प्रतिनिधि सभा सदस्य संख्या २७५ बाट २१५ मा झार्न उनको प्रस्ताव छ।

सभापति र महामन्त्री थापाको दाबी एकै पदका लागि भएको उनको भनाइ छ। ‘पार्टीमा हामी तुरुन्त निर्णय गर्ने र कार्यान्वयन नहुने समस्या छ। बरु सोच्न समय लगाऔं, सोचेपछि कार्यान्वयन गरौं। सबै केन्द्रले निर्णय गर्ने, प्रदेश र जिल्लाले के निर्णय गर्ने? प्रदेशलाई जिम्मा दिऔं। थिममा काम गरौं,’ उनले भने।