महामन्त्रीहरुले चिट थमाएर अन्य पार्टीबारे नबोल्न भन्नुभयो : शेखर कोइराला

काठमाडौँ– नेपाली कांग्रेसका नेता शेखर कोइरालाले कांग्रेस केन्द्रीय समिति बैठकमा आफूहरूलाई अन्य पार्टीबारे टिप्पणी नगर्न नभएको खुलासा गरेका छन्। केन्द्रीय समिति बैठक लाइभ प्रसारण भइरहेकाले महामन्त्रीले आफूहरूलाई चिट थमाएर अन्य पार्टीका विषयमा नबोल्न भनेको उनले केन्द्रीय समिति बैठकमा उल्लेख गरेका हुन्।

‘बैठक लाइभ हुँदैछ। असहज महसुस भइरहेको छ। सभापतिलाई लागेको होला नेताहरुले लोकरिझ्याइँका कुरा गरे भन्ने लागेको होला। सँधैभरी अप्ठ्यारो छ। महामन्त्रीहरुले चिट थमाएर अन्य पार्टीका बारेमा नबोल्नु भन्नुभयो,’ उनले भनाइ थियो।

बैठक कस्तो हुने भनेर प्रश्न गरेका उनले कांग्रेस मासवेस्ड हो कि क्याडरबेस्ड पार्टी हो भनी प्रश्न गरेका थिए। यस विषयमा छलफल गर्न सकिने बताएका उनले कार्यतालिका क्याडरवेस्ड बनाएको उल्लेख गरेका थिए। कार्यतालिकमा प्रदेशलाई समावेश गर्ने कुरा उल्लेख नभएको बताएका उनले महत्त्वपूर्ण नेताहरुको समृति र जन्मदिवस छुटेको बताए।

२०८४ मा एक्लै चुनाव लड्न कांग्रेसले प्रण गर्न आवश्यक भएको उनको भनाइ छ। ‘सरकारका बारेमा धेरै भन्नु छैन। तीन महिना मात्रै भयो। जनताको अपेक्षा स्थानीय सरकार र प्रदेश र केन्द्रका साथीहरुको अपेक्षा बढेको छ। त्यसलाई कसरी सम्हाल्ने त्यता ध्यान दिनुपर्छ। महँगी र कालोबजारीले आक्रान्त बनेको छ। जनताले कांग्रेस सरकारमा भएको अनूभूति भइरहेको छ,’ उनले भनेका थिए, ‘दण्डहीनतालाई प्रश्रय दिने काम हामीले गरेका छौं। मलाई चिन्ता लागिरहेको छ।’

मुलुकी ऐन संशोधन गर्न बनेको कानून खारेज गर्नुपर्ने उनको भनाइ छ। ‘कांग्रेसले सुशासनको नारा दिने मात्र होइन। भ्रष्टाचारीलाई संसरक्षणा गर्दैन र भ्रष्टाचारका विरुद्ध उभिन्छ भन्ने सुनिश्चित नहुने हो भने हामी जनताका घरमा जान सक्दैनौं,’ उनले भने, ‘भुटानी शरणार्थी प्रकरणमा भावनामा बगेर कुरा गरेर हुँदैन। हामी सचेत र गम्भीर हुनुपर्छ। यस विषयमा केन्द्रीय समितिले पारदर्शीता र शुसानका पक्षमा उभिने प्रण बैठकले गरोस्।’

प्रत्यक्ष निर्वाचन प्रणालीमै समानुपातिक समावेशी प्रणाली सुनिश्चित गर्न कांग्रेसले नै नेतृत्व गर्नपर्ने उनको भनाइ थियो। सत्तालाई केन्द्रमा राख्दा कांग्रेस जनताबाट टाढिएको उनको भनाइ थियो।

कांग्रेसको गत अधिवेशनमा कोइरालाले सभापति पदका लागि प्रतिस्पर्धा गरेका थिए। उनको समूहबाट महामन्त्रीमा चुनाव लडेका महामन्त्री थापा विजयी भएका थिए।