कोशी सरकार गठनविरुद्धको मुद्दा अब पूर्ण इजलासमा

कोशी प्रदेश सरकार गठनविरुद्धको रिटमाथिको सुनुवाइ पूर्ण इजलासमा हुने भएको छ। सर्वोच्च अदालतका न्यायाधीशद्वय सुष्मालता माथेमा र तिलप्रसाद श्रेष्ठको संयुक्त इजलासले उक्त रिटमाथिको सुनुवाइ पूर्ण इजलासबाट हुने आदेश गरेको हो।

‘प्रस्तुत निवेदनको विषयवस्तु हेर्दा जटिल कानुनी प्रश्न समावेश भएको देखिएको र त्यसको निराकरण पूर्ण इजलासबाट हुन उपयुक्त देखिएकाले सर्वोच्च अदालत नियमावली, २०७४ को नियम २३ (२) (ग) बमोजिम मिति २०८० साउन ९ गते पूर्ण इजलासमा पेश हुने गरी पेशी तोकी नियमन बमोजिम गर्नु,’ आदेशमा भनिएको छ।

यो रिटमाथि आइतबारका लागि पेसी तोकिएको थियो। न्यायाधीशद्वय कुमार रेग्मी र नहकुल सुवेदीको संयुक्त इजलासमा तोकिएको पनि थियो। तर रेग्मीले मुद्दा हेर्न अस्वीकार गरे। त्यसपछि सोमबारका लागि पेसी तोकिएको थियो। सोमबार पूर्ण इजलासमा पठाइएको हो।

कोशी प्रदेशमा मुख्यमन्त्री नियुक्ति प्रक्रिया असंवैधानिक भएको उल्लेख गर्दै निर्वतमान मुख्यमन्त्री हिक्मतकुमार कार्कीले रिट दायर गरेका थिए।

असार २७ गते सर्वोच्चले दूरगामी असर पर्ने गरी काम नगर्न आदेश गरेको थियो।