उद्धव थापाको नाममा महिना दिनमै दुईपल्ट मुख्यमन्त्रीको सपथ लिने रेकर्ड

काठमाडौं– गत २१ असारमा बहुमत जुटाउन माओवादी कोटाका सभामुख बाबुराम गौतमको हस्ताक्षर गराएर प्रदेश प्रमुख परशुराम खापुङसमक्ष सपथ लिएका उद्धव थापाले सर्वोच्च अदालतबाट नियुक्ति बदर गरिदिएपछि आज पुनः दोस्रोपल्ट सपथ लिँदै छन्। थापाले नवनियुक्त कोसी प्रदेशको मुख्यमन्त्रीका रुपमा पुनः आज २८ दिनपछि सपथ लिन लागेका हुन्।

उनलाई प्रदेश प्रमुख खापुङले सपथ खुवाउनेछन्। आज बिहान साढे १० बजे सपथ कार्यक्रम राखिएको कोसी प्रदेश प्रमुखको कार्यालयका सूचना अधिकारी रामकुमार श्रेष्ठले बताए।

मुख्यमन्त्री थापाले आज सानो आकारको मन्त्रपरिषद् गठन गरी नवनियुक्त मन्त्रीलाई पनि सपथ गराउनेछन्। थापाले सुरुमा ३ सदस्यीय मन्त्रिपरिषद् गठन गर्ने बुझिएको छ। यद्यपि अहिलेसम्म मन्त्रीहरुको नाम बाहिर ल्याइएको छैन।

आफ्नै दल कांग्रेस, माओवादी केन्द्र, जनता समाजवादी पार्टी र एकीकृत समाजवादीको समर्थनमा मंगलबार दोस्रो पटक कोसीको बागडोर सम्हालेका थापाले सभामुख गौतमलाई राजीनामा गराएपछि हालका लागि बहुमत संख्या ४७ जुटाउन सक्नेछन्। महिना दिनभित्र विश्वासको मत लिँदा थापाले मुख्यमन्त्री रहिरहन ४७ सांसदको समर्थन जुटाउनैपर्नेछ।

त्यसअघि बहुमत नजुटेपछि थापालाई मुख्यमन्त्री बनाउन सभामुख बाबुरामले पनि हस्ताक्षर गरेपछि एमाले सर्वोच्च अदालत पुगेको थियो। सर्वोच्चले थापाको मुख्यमन्त्री नियुक्ति बदर गरिदिएको थियो। गौतमलाई सभामुखबाट राजीनामा गराएर गठबन्धनले बहुमत जुटाएएपछि थापा पुनः मुख्यमन्त्री नियुक्त भएका हुन्।

थापाले संविधानको १६८ को उपधारा (२) अनुसार कांग्रेस, माओवादी केन्द्र, एकीकृत समाजवादी र जसपाको समर्थन जुटाएर दाबी गरेका थिए। थापालाई कांग्रेसका २९, माओवादीका १३, एकीकृत समाजवादीका ४ र जसपाका १ सांसद गरी ४७ सांसदले समर्थन गरेका छन्। ९३ सांसद रहेको सभामा बहुमत पुग्न ४७ सांसद चाहिन्छ।

यसअघि २१ असारमा पनि थापाले मुख्यमन्त्रीका रूपमा नियुक्ति लिएका थिए। तर, सर्वोच्चले २२ दिनपछि उनको नियुक्तिलाई अवैधानिक ठहर गरेसँगै सभामुखलाई राजीनामा गराएपछि मात्र उनका लागि बहुमत पुगेको हो।