पाँच एआईजीहरुको सरुवा

काठमाडौं– शुक्रबारको मन्त्रिपरिषद् बैठकले नेपाल प्रहरीका पाँच जना अतिरिक्त महानिरीक्षक (एआईजी)हरुको सरुवा गरेको छ। सरकारले नक्कली शरणार्थी प्रकरण छानबिनको नेतृत्वको लिँदै आएका उपत्यका प्रहरी कार्यालय, रानीपोखरीका प्रमुख श्यामलाल ज्ञवालीसहितका एआईजीको सरुवा गरेको हो।

नक्कली भुटानी शरणार्थी प्रकरणमा उपत्यका अपराध अनुसन्धान कार्यालय बानेश्वरले थप जाहेरी लिएर दोस्रो चरणको अनुसन्धान सुरु गर्नै लाग्दा ज्ञवाली सरुवामा परेका हुन्।

ज्ञवाली उपत्यका प्रहरी कार्यालयमा सरुवा भएको साढे ४ महिना मात्र भएको छ। उपत्यका प्रहरी प्रमुखमा प्रशासन विभागका प्रमुख दीपक थापाको सरुवा भएको छ। राष्ट्रिय प्रहरी प्रशिक्षण प्रतिष्ठानका प्रमुख एआईजी टेकप्रसाद राईको मानव स्रोत विभागमा सरुवा भएको छ। मानव स्रोतका प्रमुख सन्दीप भण्डारी राईको स्थानमा पठाइएका छन्।

प्रहरी मुख्यालय कार्य विभागमा कार्यरत एआईजी मीरा चौधरीको प्रशासनमा सरुवा भएको छ। प्रहरी मुख्यालयको कार्य विभागमा एआईजी श्याम ज्ञवालीलाई पठाइएको छ। सरकारले एआईजीत्रय केन्द्रीय अनुसन्धान ब्युरो प्रमुख किरण वज्राचार्य, अपराध अनुसन्धान विभागका टेकबहादुर तामाङ र प्रदेश समन्वय विभागका सुदीप गिरीलाई भने यथावत् राखिएको छ।