एमाले माग सम्बोधन भएपछि संसद् खुल्ने संकेत

काठमाडौं– ३ असोजमा त्रिभुवन अन्तर्राष्ट्रिय विमानस्थल भन्सारबाट जाँचपास भएर बाहिरिएको अवैध एक क्विन्टल सुन (गालेपछि ६० केजी) तस्करी प्रकरणको उच्चस्तरीय छानबिन माग गर्दै १० साउनदेखि एमालेले संसद् अवरुद्ध गर्दै आएको छ।

सुरुमा सत्ता गठबन्धनले नेपाल प्रहरीको केन्द्रीय अनुसन्धान ब्युरो (सीआईबी)बाट सुन तस्करी प्रकरणबारे छानबिन भइरहेकाले अर्को उच्चस्तरीय समिति अनावश्यक भएको भनेर एमालेलाई जवाफ फर्काएको थियो। राजस्व अनुसन्धान विभागको टोलीले फेला पारेको अवैध सुन प्रकरणको छानबिन यतिबेला सीआईबीले गरिरहेको छ।

तर, संसद्को मुख्य प्रतिपक्षी एमालेले उच्चस्तरीय छानबिन समिति गठन गरिनुपर्ने अडान लिइरहेका बेला सोमबार राजनीतिक दलहरुबीच उच्चस्तरीय छानबिन समिति गठनका लागि मोटामोटी सहमति भएपछि संसद् अवरोध खुल्ने संकेत देखिएको हो। सुन तस्करी प्रकरणमा उच्चस्तरीय समिति बनाउन दलहरुबीच सैद्धान्तिक सहमति जुटेको छ।

सोमबार राती सिंहदरबारमा बसेको उक्त बैठकमा प्रमुख प्रतिपक्षी एमालेले उठाउँदै आएको उच्चस्तरीय समिति बनाउन दलहरु सहमत भएका हुन्। बैठकले उच्चस्तरीय समिति बनाउने कुरामा सहमति जुटाउँदै तीन सदस्यीय कार्यदल पनि बनाउने निर्णय गरेको छ। सुन प्रकरणबारे छानबिन गर्न बनाइने समितिको कार्यादेश र त्यसको संरचना आज टुंग्याइनेछ।

उच्चस्तरीय समितिको कार्यादेश र संरचनाको मस्यौदा आज तयार पार्न लागिएको हो। उच्चस्तरीय समिति गठनका लागि कांग्रेस नेता रमेश लेखक, एमाले नेता सुवास नेम्बाङ र माओवादी नेता हितराज पाण्डे रहेको कार्यदल बनाउने सहमति भएको छ। कार्यदलले आज बिहान ११ बजेसम्म समितिको मस्यौदा तयार पार्नेछ। यसलाई अन्तिम रूप दिन आजै दिउँसो २ बजे शीर्ष नेताहरूको बैठक फेरि बस्नेछ।

एमाले माग सम्बोधन भएकाले आजदेखि अवरोध हट्ने नेताहरूको भनाइ छ। ‘सुन प्रकरण छानबिन गर्न उच्चस्तरीय समिति बनाउनुपर्छ भनेर एमालेले राखेको अडान सम्बोधन हुने भएपछि संसद् अवरोध गर्दैनौं’, एमालेका प्रमुख सचेतक पद्म गिरीले भने, ‘उच्चस्तरीय छानबिन समिति बनाउने सहमतिमा सरकार कायम रह्यो भने संसद् खुल्छ।’

बैठकमा सहभागी राष्ट्रिय स्वतन्त्र पार्टीका सभापति रवि लामिछानेले सुन प्रकरणमा उच्चस्तरीय छानबिन समिति गठनमा सत्तारुढ दलसँग सहमति भएपछि संसद् अवरोध हट्ने विश्वास व्यक्त गरे। उनले भने, ‘यसका लागि मस्यौदा तयार पार्ने कुरा भएको छ। अब संसद खुल्नेमा विश्वस्त छु।’

सत्तारुढ कांग्रेस प्रमुख सचेतक रमेश लेखकले संसद् अवरोध अन्त्य गर्न सबै विकल्प र सम्भावनामा छलफल भएको बताए। ‘सोमबारको बैठकमा सकारात्मक छलफल भएको छ। आज फेरि बैठक बसेर यो विषय टुंगो लगाउँछौं। ‘अब एमालेले संसद् अवरोध गर्नुहुँदैन।’

अवरुद्ध हुँदै आएको प्रतिनिधिसभाको बैठक आज बस्ने कार्यसूची छ। बैठक दिउँसो ३ बजे बोलाइएको संसद् सचिवालयले जनाएको छ। सुन तस्करी प्रकरणमा उच्चस्तरीय छानबिन समिति गठन माग गर्दै १० साउनदेखि संसद अवरुद्ध गर्दै आएको एमालेले आज भने अवरोध नगरिने बताएको छ।

सभामुख देवराज घिमिरे, प्रधानमन्त्री पुष्पकमल दाहाल प्रचण्डले संसद् अवरोध खुलाउन तीन दलीय, बहुदलीय पार्टीको बैठक बसाले पनि अहिलेसम्म सहमति भइसकेको छैन। आज मात्रै राष्ट्रपति रामचन्द्र पौडेलले पनि संसद् खुलाउन बहुदलसँग छलफल गर्दै छन्।