नाइजेरियाली सेनाको ड्रोन आक्रमणमा ८५ जनाको मृत्यु, छानबिन गर्न राष्ट्रपतिको निर्देशन

नाइजेरिया- नाइजेरियाली सेनाको ड्रोन आक्रमणमा परी कम्तीमा ८५ जना सर्वसाधारणको मृत्यु भएको छ। देशको उत्तरपश्चिमी कादुना राज्यको एउटा गाउँमा आइतबार कम्तीमा ८५ सर्वसाधारणको मृत्यु भएको हो।

उत्तरपश्चिम क्षेत्रीय कार्यालयले स्थानीय अधिकारीबाट प्राप्त गरेको विवरणअनुसार अहिलेसम्म ८५ वटा शव प्राप्त भएको छ भने, अन्य हराइरहेका मानिसको खोजी जारी रहेको  राष्ट्रिय आपतकालीन व्यवस्थापन एजेन्सीले आफ्नो फेसबुक पेजमा मङ्गलबार उल्लेख गरेको छ।

यता सेनाले भने असाबधानीले ड्रोन दुर्घटना हुँदा मुस्लिम पर्व मनाउँदै गरेका मानिस पीडित भएको बताएको छ। यद्पि सेनाले कुनै हताहतीको तथ्याङ्क दिएको छैन। तर त्यहाँका बासिन्दाले भने ८५ जना मारिएको दाबी गरेका छन्।

उता कोप २८ का लागि दुबई पुगेका राष्ट्रपति बोला तिनुबुले घटनाका सम्बन्धमा छानबिन गर्न निर्देशन दिएका छन्।

नाइजेरियाली सेनापति ताओरीद लागबाजाले आक्रमण भएको गाउँ पुगेर माफी मागेका छन्। यसका साथै घटनामा परी घाइते भएकाहरूको उपचार पनि सेनाले गर्ने उल्लेख गरेको भन्दै रोयटर्सले समाचार सार्वजनिक गरेको छ।

राष्ट्रिय आपत्कालीन व्यवस्थापन एजेन्सीले ६६ जना घाइते भएको जनाएको छ। तर स्थानीयले भने मृत्यु हुने र घाइते हुनेको संख्या अझ बढी रहेको बताउँदै आएका छन्।