बिल गेट्स र मार्क जुकरबर्ग आउने अम्बानीको छोराको बिहेखर्च १ हजार करोड!

काठमाडौँ- सामान्यतः छोराका विवाहको लागि कतिसम्म खर्च गर्ने सोच्नु भएको छ? यो प्रश्नको उत्तर अधिकांशले लाखमै दिन्छन्। केही व्यक्तिले मात्र करोडसम्म पुर्‍याउँछन्। नेपालको हकमा विवाहमा करोडसम्म औँलामा गन्ने व्यक्तिले मात्र खर्च गरेका छन्।

छिमेकी भारतमा पनि यसअघि भारतका धनी व्यवसायी मुकेश अम्बानीकी छोरीले ९० करोडको लेहेङ्गा लगाएर कीर्तिमानी राखेकी थिइन्। तिनै अम्बानीले आफ्नो छोराको बिहेमा खर्च गरेर अर्को कीर्तिमानीको तयारी गरिरहेका छन्।

भारतीय संचारमाध्ययमका अनुसार अम्बानीका छोरा अनन्त अम्बानीले राधिका मर्चेन्टसँग चाँडै विवाह गर्दैछन्। २ जनाको प्रि–वेडिङ सेरेमनी आजदेखि गुजरातको जामनगरमा सुरु हुनेछ।

विवाहमा बिल गेट्स, मार्क जुकरबर्गजस्ता अन्तर्राष्ट्रिय हस्तीदेखि बलिउड सेलिब्रेटीहरुको जमघट हुनेछ। भारतीय मिडियाको रिपोर्टअनुसार अनन्त–राधिकाको विवाहमा करिब १ हजार करोड भारतीय रुपैयाँ खर्च हुने अनुमान गरिएको छ।

यसअघि मुकेश अम्बानीकी छोरी ईशा अम्बानीको विवाहमा ४ सय करोड भारु खर्च भएको थियो। जबकि बलिउड अभिनेत्री दीपिका पादुकोण र अनुस्का शर्माको विवाहको कूल खर्च ९०–९५ करोड भारु थियो।

यसअघि प्रियंका चोपडाले निक जोनससँग विवाह गर्दा १५ करोड भारुको लुगा लगाएर सबैलाई चकित बनाएकी थिइन् । बलिउड महँगो विवाहका लागि चिनिन्छ। तर, बलिउडका शीर्ष पाँच विवाहमा लागेको खर्च बराबर अम्बानीले एउटै विवाहमा खर्च गर्ने भएका छन्।