भारतीय लोकसभा चुनाव ७ चरणमा, ८० वर्षमाथिकाले घरबाट भोट हाल्न पाउने

नयाँदिल्ली- यस वर्ष भारतमा हुन गइरहेको लोकसभा चुनाव ७ चरणमा हुने भएको छ। शनिबार भारतीय निर्वाचन आयोगले पत्रकार सम्मेलन आयोजना गरी ७ चरणमा लोकसभा चुनाव गरिने जानकारी दिएको हो।

आयोगका अनुसार अप्रिल १९ (७ वैशाख)मा पहिलो चरणको चुनाव हुनेछ भने जुन १ मा अन्तिम चरणको चुनाव हुनेछ।

दोस्रो चरण अप्रिल २६, मे ७ मा तेस्रो चरण, चौथो चरण मे १३ मा, पाँचौ चरण मे १९ र छैठौं चरणको मतदान मे २५ मा हुनेछ। विद्युतीय प्रणालीबाट हुने मतगणना जुन ४ मा बाट सुरु हुनेछ।

पहिलो चरणमा १०२, दोस्रोमा ८९, तेस्रोमा ९४, चौथोमा ९६, पाँचौँमा ४९, छैठौँमा ५७ र सातौँ चरणमा ५७ सिटका लागि मतदान हुने आयोगले जानकारी दिएको छ। भारतीय लोकसभामा ५ सय ४३ सिट छन्।
लोकसभाको ५ वर्षे कार्यकाल मे महिनामा पूरा हुँदैछ।

लोकसभा चुनावसँगै आन्ध्र प्रदेश, उडिशा, अरुणाचल प्रदेश र सिक्किममा विधानसभा चुनाव पनि हुँदैछ।

त्यस्तै, देशभरका विधानसभामा रिक्त रहेका २६ सिटमा उपनिर्वाचन पनि यही अवधिमा गराइने मुख्य आयुक्त राजीव कुमारले जानकारी दिएका छन्।

घरबाट नै मतदान गर्न चाहने ८५ वर्षभन्दा माथिका मतदाताका लागि सोही अनुसारको व्यवस्था गरिने आयोगको भनाइ छ। यस्तै ४० प्रतिशत शारीरिक अशक्तता भएका व्यक्तिलाई पनि यो सुविधा दिइने उनले बताए।

लोकसभा चुनावका लागि योग्य मतदाताको संख्या ९६ करोड ८८ लाख २१ हजार ९२६ छ। ४९ करोड ७ लाख पुरुष र ४७ करोड १ लाख महिला मतदाता छन्।

देशभरका साढे १० लाख मतदान केन्द्रमा ५५ लाख एलेक्ट्रोनिक भोटिङ मेसिनबाट मतदान कार्यक्रम सञ्चालन गर्ने आयोगले जानकारी दिएको छ।