इजरायलको आक्रमण विरुद्ध अमेरिकामा प्रदर्शन, ३ सय जना पक्राउ

काठमाडौँ- पछिल्ला दिनमा अमेरिकाका विश्वविद्यालयहरुमा प्यालेस्टाइनको पक्षमा प्रदर्शन चर्किंदै गएको छ। प्रदर्शनमा सहभागीहरुमध्ये ३०० जना पक्राउ परेका छन् भने केही विश्वविद्यालयहरुमा तोडफोड र प्रहरीसँग झडपसमेत भएको छ।

इजरायलले प्यालेस्टाइनको गाजा क्षेत्रमा गरेको आक्रमणको विरोधमा अमेरिकाका हरेकजसो विश्वविद्यालयहरुमा साना–ठूला प्रदर्शन हुँदै आएको अन्तराष्ट्रिय सञ्चार माध्यायमले जनाएका छन्। केही स्थानमा झडप र तोडफोड भएको समाचार आएका छन् भने क्यालिफोर्निया युनिभर्सिटीमा १५ जना घाइतेसमेत भएका छन्।

बीबीसीले कोलम्बिया युनिभर्सिटी र द सिटी युनिभर्सिटी अफ न्युयोर्कमा ३०० प्रदर्शनकारीलाई प्रहरीले गिरफ्तार गरेको जनाएको छ।

न्युयोर्कका मेयर एरिक एडम्सका अनुसार कोलम्बिया युनिभर्सिटीले निवेदन दिएपछि त्यहाँ बस्दै आएका विद्यार्थीहरुविरुद्ध अभियान चलाएको र गिरफ्तार गरिएको जनाएका छन्।

युनिभर्सिटीभित्र बसेर प्यालेस्टाइन समर्थकहरुले शान्तिपूर्ण प्रदर्शन गर्दै आएका थिए। तर त्यो प्रदर्शनमा घुसपैठ भएको भन्दै प्रहरीले कारबाही अभियान चलाएको हो।

न्युयोर्कका मेयरले शहरका अन्य स्थानको सुरक्षालाई पनि ध्यान दिँदै प्रहरीले कारबाही अभियान चलाउने बताएका छन्। शान्तिपूर्ण प्रदर्शन गर्ने अधिकार भए पनि हुलहुज्जत, तोडफोड र शान्ति सुव्यवस्थालाई खलल पार्न नहुने उनको भनाइ छ।

विद्यार्थीहरुले न्युयोर्क, टेक्सस, कोलम्बिया, जर्जवाशिङ्गटन, इन्डियाना युनिभर्सिटी अफ पेन्सेल्भेनिया लगायतका स्थानमा प्रदर्शन गर्दै आएका छन्।

जर्जवाशिङ्गटन युनिभर्सिटीमा विद्यार्थीहरुले गरेको प्रदर्शनमा समर्थन जनाउन रिपब्लिकन सांसदहरुसमेत पुगेका थिए।

टेक्सस युनिभर्सिटीमा एकजना पत्रकारसमेत पक्राउ परेका थिए तर पछि उनी रिहा भएका थिए।

प्यालेस्टाइनको पक्षमा अमेरिकासँगै इजिप्टको कायरो, फ्रान्सको पेरिस, अष्ट्रेलियाको सिड्नी लगायतका स्थानमा पनि प्रदर्शन हुँदै आएको छ।