सारंगीवादनमा कास्कीका गायक प्रथम

पोखरा- सारंगीवादन प्रतियोगितामा कास्कीका गोविन्द गायक प्रथम भएका छन्। लोकगायक स्व झलकमान गन्धर्वको ८८औँ जन्मजयन्तीका अवसरमा आयोजना गरिएको प्रतियोगितामा ३५ प्रतिस्पर्धीलाई पछि पार्दै गोविन्द प्रथम भएका हुन्।

नेपाल गन्धर्व समुदाय विकास केन्द्र र झलकमान गन्धर्व सारङ्गी पाठशाला संयुक्त आयोजनामा पोखरा सभागृह हलमा भएको फाइनलमा उनले २८९.५ नम्बर पाए। प्रथम भएका गोविन्दले उपाधिसहित ३५ हजार र प्रमाणपत्र प्राप्त गरे।

द्वितीय भएका बागलुङका राजेश गन्धर्वले २८७.५ र तृतीय भएका कास्कीकै विमल गायकले २८२ अङ्क प्राप्त गरे। राजेशले रु २५ हजार र विमलले १५ हजार पुरस्कार पाएका छन्।

गोरखका सुमन गन्धारी चौथो हुँदा ७ हजार ५ सय पुरस्कार हात पारे। प्रतियोगितामा प्रोत्साहन पुरस्कारस्वरुप तनुहँकी अरुणा गन्धर्वले २ हजार ५ सय पाए।

विजेतालाई संस्कृतविद् डा जगमान गुरुङ, नेपाल गन्धर्व समुदाय विकास केन्द्रका अध्यक्ष सूर्यबहादुर गायकले पुरस्कार वितरण गरेका थिए।