प्रधानमन्त्री निवासमा लुटपाट, ‘स्वतन्त्रताका पिता’को शालिक तोडफोड

ढाका- बंगलादेशमा शेख हसिनाले राजीनामा दिएपछि प्रदर्शनकारीहरू ढाकास्थित प्रधानमन्त्री निवासमा प्रवेश गरी सामान लुटपाट गरेका छन्।

प्रदर्शनकारीले प्रधानमन्त्री निवासका सामानहरू लैजाँदै गरेको एक तस्बिरमा देख्न सकिन्छ। ढाकास्थित बीबीसी संवाददाताका अनुसार प्रधानमन्त्री निवासबाट सोफा बोकेर निस्किएका मानिसलाई देख्न सकिन्छ।

बंगलादेशमा गत महिनादेखि विद्यार्थीहरू आन्दोलनमा थिए। उनीहरूको पहिलो माग सरकारी जागिरमा आरक्षण खारेज गर्ने थियो। पछि उनले प्रधानमन्त्री पदबाट शेख हसिनाको राजीनामा माग गरेका थिए ।

सोमबारै शेख हसिनाले राजीनामा दिएर भारतको अगरतला सहर गएकी छन्। त्यसपछि बंगलादेशका सेना प्रमुख जनरल वकार उज जमानले राष्ट्रका नाममा सम्बोधन गर्दै जनतालाई शान्ति कायम राख्न अपील गरेका थिए।

शेख हसिनाले प्रधानमन्त्री पदबाट राजीनामा दिएर देश छाडेपछि बंगलादेशमा हजारौं प्रदर्शनकारीले उत्सव मनाइरहेका छन्।

केही प्रदर्शनकारीले ढाकाको गणभवनमा रहेको शेख मुजिबुर रहमानको शालिकमा पनि चढेर प्रतीमा तोड्ने प्रयाससमेत गरेका छन्।

मुजिबुर रहमान शेख हसिनाका पिता थिए। उनलाई बंगलादेशको स्वतन्त्रताका पिता मानिन्छ। शेख मुजीबुरको नेतृत्वमा बंगलादेशले सन् १९७१ मा पाकिस्तानबाट स्वतन्त्रताका लागि लडेको थियो।