इन्टरनेट बन्द भएपछि बंगलादेशका अन्तर्राष्ट्रिय विमानस्थल बन्द

काठमाडौँ- बंगलादेशको राजधानी ढाकास्थित अन्तर्राष्ट्रिय विमानस्थल ६ घण्टाका लागि बन्द भएको छ।

बंगलादेशको सेनाको जनसम्पर्क निर्देशनालयले एक सूचना जारी गरी ढाकाको हजरत सहजलाल अन्तर्राष्ट्रिय बिमानस्थल साँझ ६ बजेदेखि बन्द भएको जानकारी दिएको हो। विमानस्थलका सबै कामकारबाही पनि बन्द गरिएको छ।

प्रधानमन्त्री सेख हसिनाले राजीनामा दिएपछि धेरै मानिसहरु विमानस्थलमा जान थालेपछि सेनाले बन्द गरेको हो।

यसअघि बंगलादेशकी प्रधानमन्त्री शेख हसिनाले राजीनामा दिएकी छन्। राजीनामा दिए लगतै उनी हेलिकप्टरमार्फत भारतको त्रिपुरा राज्यको अगरतलातिर गएको अन्तराष्ट्रिय संचार माध्यामले जनाएका छन्।

प्रदर्शनका क्रममा हजारौं नागरिक प्रधानमन्त्रीको निवासतर्फ गएपछि उनी ‘सुरक्षित स्थान’तर्फ सरेकी थिइन्।

बंगलादेशी सेनाका प्रमुख जनरल वाकर जमानले सबै राजनीतिक दलका नेताहरुसँग अहिलेको अवस्थाबारे छलफल गरेर अन्तरिम सरकार घोषणा गरेका छन्।

आरक्षण र कोटा प्रणालीको विरोधमा विद्यार्थीले गरेको आन्दोलन हिंसात्मक बन्दा ज्यान गुमाउनेको संख्या कम्तीमा ३ सय पुगिसकेको छ। प्रहरी र प्रदर्शनकारी बीच झडप हुँदा आइतबार मात्रै कम्तीमा ९० जना मारिएको र सयौं घाइते भएको अन्तराष्ट्रिय संचार माध्यायमले जनाएका छन्।

तनावका कारण बंगलादेशमा सोमबार देशभर इन्टरनेट सेवा समेत अवरुद्ध छ।