स्वास्थ्य प्रतिष्ठान, प्रहरी र विद्यालयलाई महालक्ष्मी विकास बैंकको सहयोग

काठमाडौँ- महालक्ष्मी विकास बैंक लिमिटेडले संस्थागत सामाजिक उत्तरदायित्व कार्यक्रमअन्तर्गत स्वास्थ्य प्रतिष्ठान, प्रहरी तथा विद्यालयलाई सामग्री हस्तान्तरण गरेको छ। बैंकको नेपालगञ्ज शाखाले हालै कोहलपुर नगरपालिका वडा नं ११ मा अवस्थित निर्धन उत्थान सञ्जिवनी स्वास्थ्य प्रतिष्ठानलाई ‘सेमी अटो एनालाइजर मेसिन’ हस्तान्तरण गरेको हो।

​प्रतिष्ठानकी अध्यक्ष पूर्णिमा शाहीलाई बैंकका लुम्बिनी प्रदेश ‘ख’ का प्रदेशिक प्रबन्धक खगेन्द्रबहादुर साउद र नेपालगञ्ज शाखाका प्रबन्धक बिन्दुप्रसाद शर्माले हस्तान्तरण गरेका हुन्।

विपन्न वर्गका समुदायलाई न्यूनतम मूल्यमा किड्नी, लिभर, सुगर र युरिक एसिडसम्बन्धी प्रयोगशाला जाँच सहज बनाउने उद्देश्यले प्रतिष्ठानलाई सहयोग गरेको बैंकले जनाएको छ। जिल्ला प्रहरी परिसर, टेकुका प्रहरी वरिष्ठ उपरीक्षक धनबहादुर कार्कीलाई डल्लु शाखाका शाखा प्रबन्धक आशिषबहादुर धमला र ठमेल शाखाका शाखा प्रबन्धक युधिरमान सिंहले सामग्री हस्तान्तरण गरेका हुन्।

त्यस्तै बैंकको डल्लु र ठमेल शाखाले जिल्ला प्रहरी परिसर, टेकु, काठमाडौंलाई ब्यारिकेट, कोन तथा गोप्रो क्यामरा हस्तान्तरण गरेको छ। काठमाडौं महानगरपालिकामा सार्वजनिक सुरक्षा, अमन चयन कायम राख्न, सम्भावित अपराधको रोकथाम नियन्त्रण तथा अनुसन्धानमा सहयोग पुर्‍याउन सहयोग प्रदान गरेको बैंकले जनाएको छ।

यता बैंकको वीरगञ्ज शाखाले महानगरपालिकाको वडा नं. १४ स्थित सिद्धार्थ माध्यामिक विद्यालयलाई छ थान स्मार्ट टेलिभिजन हस्तान्तरण गरेको छ।

विद्यालय व्यवस्थापन समितिका सदस्य शिवशंकर पटेललाई बैंकका मधेश प्रदेशका प्रबन्धक सुदीपचन्द्र पोखरेल र वीरगञ्ज शाखाका शाखा प्रबन्धक पुरुषोत्तम अधिकारीले सामग्री हस्तान्तरण गरे। बालविकास ईसीडीदेखि १२ कक्षा सम्म अध्यापन हुने विद्यालयलाई विद्यार्थीमैत्री बनाउन मद्दत पुर्‍याउने उद्देश्यले स्मार्ट टेलिभिजन सहयोग गरेको बैंकले जनाएको छ।

आगामी दिनमा पनि सामाजिक उत्तरदायित्व कार्यक्रम अन्तर्गत सामाजिक, आर्थिक रूपान्तरणका कार्यक्रम निरन्तर रूपमा सञ्चालन गर्ने कुरा बैंकले जनाएको छ।