लोकभाकामै रमाए अस्टिनमा नेपाली

अमेरिका (अस्टिन )- मार्मिक शब्दहरुका मनछुने भावना मिठो लयमा गुन्जन थालेपछि हलमा उपस्थित सबैका कान र ऑखाहरु स्टेज तिरै सोझिए। परदेसिएकै भएपनि नेपाली मनले त्यो आबाजको भेउ पाईहाले। हातमा माइक्रोफोन बोकेर स्टेजमा चढदै गरेकी रचना रिमालले सुरु गरिन् मखमली फुल्दा मर्सी धान झुल्दा…….नमुछे आमा दहिमा टिका नछरे जमरा।

वरिष्ठ लोक गायक, संगीतकार एवं संकलक नारायण रायमाझीको चर्चित यो गीतले नछुने कुनै नेपाली मुटु छैन होला। स्टेजमा यो गीत गाउदै गायिका रिमालले हलको चारैतिर छरिएर बसेका सबै संगीतप्रेमीलाई स्टेजको मझेरी मै डाकिन्। र, यस्तै मन छुने करिब एक दर्जन लोकप्रिय गीत गाईन्।

स्टेजलाई तडक भडकले उचाल्ने भन्दा पनि उनको प्रस्तुति शालीन र लयात्मक रह्यो। सुरिलो स्वरमा दर्शक स्रोतालाई नचाउँदै उनले फोटो फ्रेममा, मेरो प्रिति पहिले होकी, संझने पानी छम्कने , जस्ता मन छुने करिव एक दर्जन गीत गाईन्। गोर्खा ग्रुपले आयोजना गरेको अब नाच्छ अस्टिन कार्यक्रममा प्रस्तुती दिन आईतबार टेक्सासको राजधानी अस्टिन आएका लोकप्रिय कलाकारहरु शान्ति श्री परियार, रचना रिमाल, करिश्मा ढकाल र ज्योति मगरले अस्टिनवासी नेपालीलाई रहर पुग्ने गरि नचाए।

“गीत संगीतले देश संझाउदो रहेछ, भाषाले मनहरु जोडिरहदो रहेछ, आफ्नो देशका कलाकारसँग रम्न पॉऊदा एकछिन भए दुख बिर्सायो, नेपालै पुगे जस्तो भयो” एक दर्शक स्रोताले आफ्नो अनुभव सुनाए। कार्यक्रममा प्रस्तुती दिन अर्की चर्चित लोकगायिका शान्ति श्री परियार स्टेजमा आएर गाउन सुरु गरेपछि स्रोता नहल्ली वस्नै सकेनन्। कसैलाई नाच त भन्नै परेन, जानेका सुरमा नाचे, नजान्नेले सरिरै हल्लाएर भएपनि नाच्ने धोका पुर्याए। उनले गाएका “वोल माया एक वचन बोल तिम्रै वोली छ मलाई अनमोल, लाउन्न दाजै पिरती, अरेली कॉडैले, लाहौर जाने रेलैमा, हिजो राती सपनीमा, गलवन्दी च्यातियो, नेपालीले औंधी रुचाएका गीत हुन्। उनले संघर्ष गरेर अमेरिका आई वसेका नेपालीलाई साहानुभूति दिदै दुख र सुखलाई समान रुपले लिनु पर्ने सुझाब पनि दिईन्। नेपालीकै मायाले आफु याहॉ पाउन पाएको भन्दै उनले सबै दर्शक श्रोतालाई धन्यबाद दिईन्।

कलाकार करिश्मा ढकालले स्टेजमा नाचेर सबैलाई तरंगित पारिन्। कार्यक्रममा फुर्तिलो प्रस्तुति दिदै ज्योति मगरले सबैलाई रसिक वनाईदिईन्। जोशिला युवा जमातलाई उनको नाच्ने र गाउने शैलीले छुट्टै मज़ा दिन्छ।

कार्यक्रम भव्यताका साथ सम्पन्न भएपछि नेपाल सरकारका पर्यटन दूत तथा फ्लाईनेपाका निर्देशक विनोद अधिकारी र गोरखा ग्रुप एलएलसीका प्रबन्ध निर्देशक समाजसेवी डिबी रावतले सबैलाई धन्यवाद दिए। रावतले कार्यक्रममा सघाएका नेपाली मूलका अमेरिकी व्यवसायी लिला दानीलाई पनि सप्रेप धन्यवाद दिए।

गोरखा ग्रुप एलएलसीका प्रबन्ध निर्देशक रावत अमेरिकामा बसेर समाजसेवामा सक्रिय व्यक्ति हुन्। उनले अमेरिकासँगै नेपालका विभिन्न ठाउँमा ठूलो योगदान पुर्‍याएका छन्। प्रवासी नेपाली माझ परिचित रावतले यसअघि पनि विभिन्न इभेन्टहरु सफलतापूर्वक सम्पन्न गरेका थिए।

प्रबन्ध निर्देशक रावतले परदेशमा रहेका नेपालीलाई आफ्नो घर देशको झल्को दिलाउने उद्देश्यले कार्यक्रम गरिएको बताए। ‘कार्यक्रम अत्यन्तै सफल रह्यो, यसले हाम्रो प्रयासलाई सार्थक बनाएको ठानेका छौं,’ उनले भने।

उक्त कार्यक्रम भव्यताका साथ सम्पन्न भए पश्चात् आउने नेपाली नयाँ वर्षको अवसरमा मार्च, अप्रिल र मेमा ‘नेपाल-अमेरिका शुभकामना साँझ-२०२५’को समेत घोषणा गरिएको थियो। सो कार्यक्रममा अमेरिका आउन चाहने  नेपाली कलाकारहरूलाई प्रबन्ध निर्देशक रावत वा गोरखा ग्रुप एलएलसीमा सम्पर्क गर्न आग्रह गरिएको छ।