बिमामा ‘बिग मर्जर’, तीन कम्पनी गाभिएपछि हिमालयनले थाल्यो एकीकृत कारोबार

काठमाडौँ- तीन जीवन बिमा कम्पनीहरू मर्ज भएर बनेको हिमालयन लाइफ इन्स्योरेन्सले एकीकृत कारोबार सुरु गरेको छ। प्राइम लाइफ इन्स्योरेन्स, युनियन लाइफ इन्स्योरेन्स र गुराँस लाइफ इन्स्योरेन्सबीच मर्जर भई बनेको हिमालयन लाइफ इन्स्योरेन्सको चुक्ता पुँजी ८ अर्ब २ करोड रुपैयाँ पुगेको छ।

मर्जर शुभारम्भ कार्यक्रममा नेपाल बीमा प्राधिकरणका अध्यक्ष सूर्यप्रसाद सिलवालले जीवन बीमा अपरिहार्य रहेकोले गरिब र न्यून आय भएका जनताको बीचमा पुगेर जीवन बीमा व्यवसाय गर्न निर्देशन दिए।

एकीकृत कारोबार शुभारम्भ समारोहमा बोल्दै कम्पनीका प्रमुख कार्यकारी अधिकृत मनोजलाल कर्णले एक वर्ष मर्जर अभियानमा सक्रिय सबैमा कृतज्ञता ज्ञापन गर्दै आगामी दिनमा देशकै नम्बर १ कम्पनी बनेर बीमा सेवा प्रदान गर्ने दाबी गरे।

हिमालयन लाइफको जगेडा कोषमा ९० करोड रुपैयाँ छ। जीवन बीमा कोषमा ५० अर्ब ११ करोड रुपैयाँ जम्मा भएको छ। त्यसैगरी प्राकृतिक विपद् कोषमा ३३ करोड १० लाख रुपैयाँ पुगेको छ। सम्पत्तिमा लगानी ९ अर्ब ६८ करोड रुपैयाँ पुगेको छ।

मर्जरपछि कम्पनीको कुल लगानी ५१ अर्ब ९५ करोड पुगेको छ। चालू आर्थिक वर्षको तेस्रो त्रैमाससम्ममा कुल बीमा शुल्क संकलन ७८ अर्ब ७६ करोड रुपैयाँ पुगेको छ। यी तीन कम्पनीले ४० हजार ६३७ वटा बीमा पोलिसीको दाबी भुक्तानी गरिसकेका छन्। हालसम्मको दाबी भुक्तानी रकम १५ अर्ब १९ करोड रुपैयाँ पुगेको छ। कम्पनीले बिक्री गरेका पोलिसी संख्या ५ लाख १२ हजार ६५८ पुगेको छ।

चुक्ता पूँजीका हिसाबमा जीवन बिमा कम्पनीका क्षेत्रमा हिमालयन दोस्रो ठू्लो, जीवन बीमा कोषका हिसाबले चौथो ठूलो, शाखा सञ्जाल, नवीकरण गरेका अभिकर्ताको संख्या र कर्मचारी संख्याका हिसाब पहिलो स्थानमा पुगेको छ।

हाल निर्जीवन बीमा कम्पनीको १ अर्ब र जीवन बीमा कम्पनीको २ अर्ब रुपैयाँ न्यूनतम चुक्तापूँजी हुनुपर्ने व्यवस्था छ। आगामी चैत मसान्तभित्र निर्जीवन बीमा कम्पनीको २ अर्ब ५० करोड र जीवन बीमा कम्पनीको ५ अर्ब रुपैयाँ पुर्‍याउनुपर्ने समितिको निर्देशन छ। बीमा समितिले १ महिनाअघि बीमा कम्पनीको चुक्तापुँजी बढाउने निर्देशन दिएको थियो।

२०७९ वैशाख २९ गते यी तीन कम्पनीले मर्जरमा जाने प्रारम्भिक सम्झौता गरेका थिए।