इमरान खानलाई तत्कालै रिहा गर्न अदालतको आदेश

काठमाडौं– पूर्वप्रधानमन्त्री इमरान खानलाई गत मंगलबार पक्राउ गरिएपछि अशान्त रहेको पाकिस्तान शान्त हुने देखिएको छ। पाकिस्तानको सर्वोच्च अदालतले पूर्वप्रधानमन्त्री खानलाई तुरुन्तै रिहा गर्न सरकारलाई आदेश दिएको छ।

सर्वाेच्चले खानको गिरफ्तारी गैरकानुनी भएको फैसला गर्दै तत्काल रिहा गर्न आदेश दिएको हो। बीबीसीका अनुसार सर्वोच्च अदालतले इमरानलाई इस्लामावाद हाई कोर्टमा जान भनेको छ भने उसले जे निर्णय गर्छ, त्यो स्वीकार्नुपर्नेछ।

भ्रष्टाचारको मुद्दामा इमरान खानलाई गत मंगलबार अदालत परिसरबाटै पक्राउ गरिएको थियो। त्यसपछि उनका वकिलले गिरफ्तारी गैरकानुनी भएको भन्दै सर्वोच्च अदालतमा रिट हालेका थिए।

गिरफ्तारीविरुद्ध खानले दिएको उजुरीमा सुनुवाइ गर्दै पाकिस्तानका प्रधानन्यायाधीश उमर अता बन्दियालले यस्तो आदेश दिएका हुन्। इमरान पक्राउ परेपछि पाकिस्तानमा विरोध प्रदर्शन र हिंसात्मक झडपको शृंखला सुरु भएको थियो।

खानको गिरफ्तारीपछि पाकिस्तानमा भएका प्रदर्शनमा कम्तीमा ८ जनाको ज्यान गएको छ भने १४ सय जनालाई पक्राउ गरिएको छ। भ्रष्टाचार आरोपमा उनीविरुद्ध दर्जनौं मुद्दा दर्ता गरिएका छन्। ती मुद्दा राजनीतिक उद्देश्यले लगाइएको खानले दाबी गर्दै आएका छन्।