इजरायली बन्धकहरूलाई रिहा गर्न हमास तयार, पहिलो चरणमा ३४ जनालाई छाड्ने

एजेन्सी – आइतबार इजरायली बन्धकहरूलाई रिहा गर्न हमास सहमत भएको छ।

समाचार एजेन्सी एएफपीका अनुसार हमासले आदानप्रदान सम्झौताको पहिलो चरणमा ३४ जना बन्धकहरूलाई रिहा गर्नेछ। यसमा सबै महिला, बालबालिका, वृद्ध र बिरामी कैदीहरू समावेश छन्। तिनीहरू जीवित वा मृतक के हुन् खुलाइएको छैन।

हमासका एक सदस्यले एएफपीलाई बताएअनुसार बन्धकहरूको रिहाइका लागि लामो समयदेखि वार्ता चलिरहेको थियो। इजरायलले पनि बन्धकहरूको सूची पठाएको थियो। यद्यपि यो प्रक्रियामा हमासलाई एक हप्ता लाग्नेछ। यस अवधिमा अपहरणकर्ताहरूले जीवित र मृत कैदीहरूको पहिचान गर्नेछन्।

इजरायली प्रधानमन्त्री बेन्जामिन नेतन्याहुको कार्यालयका अनुसार हाल हमासले बन्धकहरूलाई रिहा गर्ने सूची पठाएको छैन।

७ अक्टोबर २०२३ मा हमासले गाजा सीमामा धेरै इजरायली क्षेत्रहरूमा आक्रमण गरेको थियो र २५४ मानिसहरूलाई बन्धक बनाएको थियो। हालसम्म १५० भन्दा बढी बन्धकहरुलाई रिहा गरिसकिएको छ भने करिब १०० जना हमासको बन्दीमा रहेका छन्। इजरायली सेनाले ३४ जनाको मृत्यु भएको पुष्टि गरेको छ।

गाजामा युद्धविराम र इजरायली बन्धकहरूको रिहाइका लागि कतारमा इजरायल र हमासबीच वार्ता चलिरहेको थियो। दुई पक्षबीच सहमतिका लागि अमेरिका, कतार र इजिप्टले केही महिनादेखि मध्यस्थता गर्दै आएका थिए।

जनवरी ४ मा प्रधानमन्त्री नेतन्याहुको घरबाहिर मानिसहरूले प्रदर्शन गरेका थिए। त्यसपछि प्रहरीले ४ जनालाई पक्राउ गरेको थियो। तेल अवीवलगायत इजरायलका अन्य राज्यहरूमा परिवारका सदस्यहरूले विरोध प्रदर्शन गर्दै सरकारलाई हमासद्वारा कैदमा परेका मानिसहरूलाई रिहा गर्न अपील गरिरहेका छन्।