बेलायती विश्वविद्यालयका विद्यार्थी ब्रिटिस कलेजमा

काठमाडौँ- बेलायतस्थित लिडस् बेकेट विश्वविद्यालयका ८ जना विद्यार्थी ब्रिटिस कलेजमा आएका छन्। थापाथलीस्थित द ब्रिटिस कलेज र लिडस् बेकेटबीच भएको विद्यार्थी आदानप्रदान कार्यक्रमअन्तर्गत पहिलो पटक लिड्सका विद्यार्थी ब्रिटिसमा आएका हुन्।

कलेजका मार्केटिङ प्रमुख अमरदीप मण्डलले विद्यार्थी आदानप्रदान कार्यक्रमबाट आफूहरू उत्साहित रहेको बताए। ‘यो कार्यक्रम विद्यार्थीहरुका लागि सफल हुने विश्वास हामीले लिएका छौँ। अर्को पटक ब्रिटिस कलेजका विद्यार्थी लिड्स बेकेट विश्वविद्यालय जानेछन्,’ उनले भने।

पहिलो चरणको विद्यार्थी आदानप्रदान कार्यक्रम मे १५ देखि मे १९ सम्म सञ्चालन भईरहेको छ। लिड्स बेकेटका विद्यार्थीका साथमा उक्त विश्वविद्यालयमा कम्प्युटर विज्ञानअन्तर्गत डिजिटल फरेन्सिक्स तथा साईबर सेक्युरिटी विषयका वरिष्ठ लेक्चरर डा पुनी बाघेरी पनि आएका छन्। उनीहरूले ब्रिटिस कलेजका विद्यार्थीसँग इन्टरनेट अफ थिङ्स (आईओटी)मा प्रोजेक्ट कार्य गरिरहेका छन्।

कलेजले गत वर्ष आईओटी ल्याब सञ्चालनमा ल्याएको थियो। ल्याबमा डिजिटलाइजेसनसम्बन्धी विभिन्न स्रोतसामग्री र उपकरण जडान गरिएको छ। ल्याबले विद्यार्थीहरुलाई अध्ययन तथा अनुसन्धानमा सहयोग गर्दै आएको छ।