भृकुटीमण्डपमा छैटौं संस्करणको चेम्बर एक्स्पो

काठमाडौं– नेपाल चेम्बर अफ कमर्सको आयोजनामा भृकुटीमण्डपमा छैटौं चेम्बर एक्स्पो सुरु भएको छ। मेलामा स्वदेशी उत्पादनसँगै विभिन्न अन्तर्राष्ट्रिय वस्तु प्रदर्शनी तथा बिक्रीका लागि राखिएका छन्। चेम्बर एक्स्पोको श्रम, रोजगार तथा सामाजिक सुरक्षामन्त्री शरदसिंह भण्डारीले उद्घाटन गरे।

मन्त्री भण्डारीले निजी क्षेत्रमैत्री वातावरण सिर्जना गर्न सरकार प्रतिबद्ध रहेको बताए। उद्योग, व्यवसायमैत्री नीतिमार्फत निजी क्षेत्रसँग सहकार्य गर्न सरकार तयार रहेको मन्त्री भण्डारीको भनाइ छ।

कार्यक्रममा चेम्बर अध्यक्ष राजेन्द्र मल्लले कठिन आर्थिक अवस्थामा पनि व्यावसायिक गतिविधिलाई बढाउन व्यापार मेला आयोजना गरिएको जानकारी दिए। व्यापार मेलामा अन्तरक्रिया, आयात–निर्यातको सूचना आदान–प्रदान एवं नेपाली वस्तुको बजारीकरणमा जोड दिइने उनले बताए। अध्यक्ष मल्लले विदेशबाट आउने वस्तुको भन्सारमा सहजीकरण एवं कार्यक्रम सकिएपछि वस्तु फिर्ता लैजान पाउने व्यवस्थाका लागि सरकारसमक्ष आग्रह गरे।

वाणिज्य सचिव मधु मरासिनीले अर्थतन्त्रलाई चलायमान बनाउन व्यापार मेला फलदायी हुने विश्वास व्यक्त गरे। यस्ताखाले व्यापार मेला केन्द्रदेखि स्थानीय तहसम्मै चलाउन सरकारले नीतिगत व्यवस्था गरिरहेको उनले जानकारी दिए।

मेलामा नेपालमै उत्पादित घरेलु तथा हस्तकलाका सामग्री, जडीबुटी, अटोमोबाइल, विद्युतीय सामग्री, फेसन वेयर, छालाजन्य वस्तु प्रदर्शनी एवं बिक्रीका लागि राखिएको छ। आगामी ८ जेठसम्म चल्ने मेलामा स्वदेशी उद्योगी व्यवसायीसँगै भारत, बंगलादेश पाकिस्तानलगायतका मुलुकका उद्योगी, व्यवसायीले सहभागिता जनाएका छन्।