अमेरिकामा ६४ जना यात्रु बोकेको विमान हेलिकप्टरसँग ठोक्कियो

एजेन्सी – अमेरिकाको राजधानी वासिङ्टन डिसीमा एक यात्रुवाहक विमान र हेलिकप्टर आपसमा ठोक्किएका छन्।

दुर्घटनापछि दुवैजना पोटोम्याक नदीमा खसेका थिए। विमानमा ४ चालक दलका सदस्यसहित ६४ जना सवार थिए। वासिङ्टन फायर डिपार्टमेन्टका अनुसार स्थानीय समय अनुसार बुधबार राति रोनाल्ड रेगन एयरपोर्ट नजिकै उक्त घटना भएको हो।

अमेरिकी एयरलाइन्सको सीआरजे ७०० बम्बार्डियर जेट र अमेरिकी सेनाको सिकोरस्की एच ६० हेलिकप्टरबीच दुर्घटना भएको हो। सेनाका अधिकारीका अनुसार हेलिकप्टरमा तीन जना पनि सवार थिए।

एयरलाइन्स कम्पनीले राति ९ बजेपछि दुर्घटना भएको पुष्टि गरेको छ। यो जेट कन्सास राज्यबाट राजधानी वासिङ्टन आउँदै थियो। अधिकारीहरूले भने कि रीगन राष्ट्रिय एयरपोर्टमा राति करिब ९ बजे विमान दुर्घटनाको समाचाहरू आएका थिए।

अहिले विमानस्थलमा सबै उडान र अवतरण रोकिएका छन्। दुवै विमानको भग्नावशेष पोटोमाक नदीमा छ।

वाशिंगटन पोस्टका अनुसार धेरै शवहरू पानीबाट बाहिर निकालिएका छन्। सोही सयमा एनबीसीले गरेको रिपोर्टअनुसार पोटोम्याक नदीबाट चार जनालाई जीवितै बाहिर निकालिएको छ।

अमेरिकी ह्वाइट हाउसकी प्रवक्ता क्यारोलिन लेविटले राष्ट्रपति ट्रम्पलाई दुर्घटनाबारे जानकारी गराइएको बताइन्। ट्रम्पले मानिसहरूलाई शान्त रहन र उद्धारका लागि अधिकारीहरूलाई निर्देशन दिएका छन्।

उपराष्ट्रपति जेडी भान्सले दुर्घटनाप्रति दुःख व्यक्त गरेका छन्।