५ अर्ब लगानीको लुम्बिनी केबुलकार सञ्चालनमा आउँदै

काठमाडौं- रुपन्देहीको बुटवलदेखि पाल्पाको वसन्तपुर जोड्ने गरी निर्माण भइरहेको ‘लुम्बिनी केबुलकार’ सञ्चालनको अन्तिम तयारीमा पुगेको छ। बुटवल र पाल्पाको तिनाउ गाउँपालिका–३ मा पर्ने ऐतिहासिक तथा पुरातात्विक क्षेत्र वसन्तपुर जोड्ने लुम्बिनी केबुलकार निर्माण सम्पन्न भई हाल प्राविधिक परीक्षण सुरु गरिएको हो।

१५ जेठदेखि नियमित सञ्चालन गर्ने लक्ष्यका साथ तयारी भइरहेको कम्पनीका आयोजना व्यवस्थापक गोकुल साउदले जानकारी दिए। उनका अनुसार वसन्तपुरमा निर्माण गरिएको कामाख्या देवी मन्दिरमा १२ देखि १८ जेठसम्म महायज्ञ सञ्चालन गरिने भएको छ।

केबुलकारको आधार स्टेसन बुटवलको वडा–३ बमघाट र माथिल्लो स्टेसन वसन्तपुरमा रहनेछ। केबुलकारको लम्बाइ २. ६ किलोमिटरको हुनेछ।

केबुलकारमा २५ वटा गोन्डुला रहनेछन् भने एउटा गोज्डुलामा एकैपटक ८ जनाले यात्रा गर्न सक्नेछन्। साथै, प्रतिघन्टा अधिकतम ६ सय यात्रुलाई सेवा दिन सकिनेछ भने केबुलकार पूर्ण क्षमतामा सञ्चालन हुँदा दैनिक ५ हजार यात्रु आउजाउ गर्न सक्ने कम्पनीको भनाइ छ।

व्यवस्थापक साउदका अनुसार आयोजनामा करिब ५ अर्ब लगानी भएको छ। जसमा केबुलकार, क्यासिनोसहितको १५० कोठाको पाँच तारे होटल, कामाख्या देवीको मन्दिर, रेस्टुराँ तथा बार र पार्क निर्माण गरिनेछ।

वसन्तपुरलाई पर्यटकीय गन्तव्यका रुपमा विकास गरी भारतीय पर्यटक भित्र्याउने लक्ष्यसहित केवलकार निर्माण गरिएको हो। केबुलकार सञ्चालनमा आएसँगै यस वरपरका क्षेत्रमा पर्यटन विकाससँगै आर्थिक गतिविधि चलायमान हुने उनको भनाइ छ। केबुलकार शिलान्यास तत्कालीन प्रधानमन्त्री केपी ओलीले १ फागुन २०७७ मा गरेका थिए।