सलमानको फिल्म ‘सिकन्दर’को टिजर सार्वजनिक गर्न किन रोजियो ३:३३ को समय?

काठमाडौँ- सलमान खानको फिल्म ‘सिकन्दर’ फिल्मको दोस्रो टिजर सार्वजनिक भएको छ। सन् २०२५ को ईदको अवसर पारेर प्रदर्शनमा आउन लागेको चलचित्र सार्वजनिक गर्ने मिति भने खुलाइएको छैन। फिल्मको बिहीवार आएको टिजरमा सलमान खानको एक्सनसँगै रश्मिका मण्डानाको झलक पनि देखाइएको छ।

‘सिकन्दर’को टिजर एक्सन सिनबाट सुरु भएको छ। टिजरमा सलमानले भनेका छन्, ‘इंसाफ नहीं साफ करने आया हूं (म न्याय दिलाउन होइन, सफाइ गर्न आएको हुँ) काइदामा रहनुहोस्, फाइदामा रहनुहोस्। नत्र मशानघाट जानु पर्ला!’ टिजरमा मुख्य अभिनेत्री रश्मिका मन्डानाको दुई-तीन दृश्यहरू पनि देखाइएको छ।

टिजरमा सलमान र रश्मिकाको नृत्य थपिएको छ। यो फिल्ममा सत्यराजले खलनायकको भूमिका निर्वाह गर्ने भएका छन्। ‘आफूलाई खुब ठूलो ‘सिकन्दर’ ठान्छस्,’ सलमानप्रति सत्यराजको डाइलग छ।

टिजर सेयर गर्दै सलमान खानले लेखेका छन्- ‘जसले दिलमा राज गर्छ ऊ आज ‘सिकन्दर’ कहलाउँछ।’

‘सिकंदर’लाई साजिद नाडियाडवालाले निर्माण गरेका हुन्। एआर मुर्गाडोसले निर्देशन गरेका छन्। फिल्ममा काजल अग्रवाल, शर्मन जोशी र अञ्जिनी धवन पनि देखिनेछन्।

सिकन्दरको पहिलो टिजर २७ डिसेम्बरमा सलमान खानको ५९औँ जन्मदिनको विशेष अवसरमा रिलिज हुने भएको थियो। तर, एक दिनअघि २६ सेप्टेम्बरमा पूर्वप्रधानमन्त्री मनमोहन सिंहको निधनको खबर आउनेबित्तिकै निर्माताहरूले यसलाई स्थगन गरेका थिए। पछि २८ डिसेम्बरमा यो फिल्मको पहिलो टिजर सार्वजनिक भएको थियो।

सलमान र निर्देशक एआरको पहिलो पटक सहकार्य भएको हो। टिजर नाडियाडवाला ग्रान्डसन युट्युब च्यालनमा सार्वजनिक गरिएको हो। फिल्मको स्ट्रिमिङ पार्टनर नेटफ्लिक्स रहेको छ।

भारतीय समयअनुसार बिहीवार दिउँसो ३:३३ बजे दोस्रो टिजर सार्वजनिक गरिएको हो। यो समय नै चाहिँ किन रोजियो त? निर्माण पक्षले यो विषयमा कुनै पनि विषय खुलाएको छैन।

तर फ्यानहरूले विभिन्न अडकलबाजी लगाएका छन्। एक फ्यानका अनुसार यो समयसँग निर्देशक एआरको स्पेसल कनेक्सन छ। ती फ्यानका अनुसार निर्देशक एआरको शुभ अंक ९ हो। त्यसर्थ टिजर सार्वजनिक गर्ने समयको योगफल पनि ९ आउने गरी निर्धारण गरिएको हो। यी तीन अंकको योगफल (३+३+३=९) ९ हुने ती फ्यानको तर्क छ।

यसअघि डिसेम्बर २६ मा फिल्मको पहिलो टिजर ११:७ बजे सार्वजनिक गरिएको थियो। यसको योगफल (१+१+७) पनि ९ हुने फ्यानको तर्क छ।